جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عالىمدارى ەكى جىلدان بەرى بال اراسى شارۋاشىلىعىن دامىتۋ جونىندە جاڭا جوبانى قولعا العان بولاتىن, دەپ جازادى Egemen.kz.
«باتىس قازاقستاندا بال اراسى شارۋاشىلىعىن دامىتۋ جوباسى ەكى جىلدا ايتارلىقتاي ناتيجە كورسەتتى», دەيدى ماماندار.
جاڭگىر حان ۋنيۆەرسيتەتى رەكتورى, عىلىم دوكتورى, اكادەميك اسقار نامەتوۆتىڭ باستاماسىمەن قولعا الىنعان جوباعا ۋنيۆەرسيتەت قۇرامىنداعى «ۆەتەرينارلىق مەديتسينا جانە مال شارۋاشىلىعى» ينستيتۋتىنىڭ اعا وقىتۋشىلارى گۇلدانا يدريسوۆا مەن بەرىك ساتىباەۆ جەتەكشى بولىپ بەكىتىلگەن ەدى. 2020 جىلى جەكە قاراجاتقا بال اراسىنىڭ 10 ۇياسىن ساتىپ العان ۋنيۆەرسيتەت باسشىلىعى ول ومارتالاردى «زولوتوي ۋلەي» شارۋا قوجالىعىنىڭ القابىنا ارنايى كەلىسىمشارت بويىنشا ورنالاستىرعان. ءسويتىپ, قوجالىق يەسى سەرگەي كريۆوبوكوۆپەن بىرگە ارا شارۋاشىلىعىمەن اينالىساتىن مەكەمە-ۇيىمدارمەن ارىپتەستىك بايلانىس ورناتىلىپ, قىزمەت اياسىن ودان ءارى كەڭەيتۋ جۇمىستارى جۇرگىزىلۋدە.
– بيىل ءۇشىنشى جىل قاتارىنان ءبىزدىڭ ومارتامىزدا «ەكولوگيا», «ۆەتەرينارلىق مەديتسينا» جانە «ۆەتەرينارلىق سانيتاريا» ماماندىعى بويىنشا ءبىلىم الاتىن ستۋدەنتتەر تاجىريبەلىك ماشىقتان وتۋدە. مۇندا ولار ارا شارۋاشىلىعىنا كىرىسپە, بال ونىمدەرىن الۋدىڭ كەزەڭدەرىن يگەرىپ, ارانىڭ اۋرۋلارىمەن جانە ونىڭ زيانكەستەرىمەن كۇرەسۋ جولدارىن مەڭگەرەدى, – دەدى بەرىك عاريپوللا ۇلى.
گۇلدانا زەينوللاقىزىنىڭ ايتۋىنشا, بال ارالارى شارۋاشىلىعىندا ازىرگە تەك قانا بال الىنىپ جاتىر ەكەن.
– ءار ماۋسىمدا ءبىر ارا ۇياسىنان 15 كەلىگە دەيىن بال الىنادى. ارينە, ءونىم كولەمى اۋا رايىنا بايلانىستى وزگەرۋى مۇمكىن, – دەيدى عالىم.
شارۋاشىلىق باسىندا بال ارالارىنىڭ تىلسىم قۇپياسىنا قانىعىپ جۇرگەن ستۋدەنتتەر وسى جوباعا قىزىعۋشىلىق تانىتىپ, جاڭا جوبالار جاساقتاپ, گرانتتىق قارجىلاندىرۋ بايقاۋلارىنا ۇسىنا باستاعان. سونىمەن قاتار جوبا جەتەكشىلەرى بەرىك ساتىباەۆ پەن گۇلدانا يدريسوۆا رەسەيدە بىلىكتىلىك كۋرستارىنان ءوتىپ, ءتۇرلى گرانتتىق بايقاۋلارعا قاتىسىپ ءجۇر.
بۇگىندە بقاتۋ عالىمدارى جەرگىلىكتى اكىمدىككە بال اراسى شارۋاشىلىعىن دامىتۋدىڭ 2026 جىلعا دەيىنگى تۇجىرىمداماسىن دايىنداۋعا كومەكتەسكەن. قازاقستان ومارتاشىلارىنىڭ «بال-ارا» اتتى ۇلتتىق وداعىمەن دە ىنتىماقتاستىق مەموراندۋمى جاسالعان. سونداي-اق حالىقارالىق دەڭگەيدەگى عىلىمي-زەرتتەۋ ينستيتۋتتارىمەن دە كەلىسىمشارتتار تۇزىلگەن. مۇنداي ارىپتەستىك بايلانىس ارا شارۋاشىلىعى بازاسىن كەڭەيتۋگە, دامىتۋعا سەپتىگىن تيگىزەرى انىق. سونىمەن قاتار ۋنيۆەرسيتەتتەگى «قايتا وڭدەۋ وندىرىستەرىنىڭ تەحنولوگياسى» جوعارى مەكتەبىمەن بىرلەسە بال اراسى ونىمدەرىن دايىنداۋ جوبالارى ازىرلەنگەن.
سوڭعى جاڭالىق – بال اراسىنىڭ تۇقىمىن جاقسارتۋ ءۇشىن جاقىندا رەسەيدەن انالىق ارا ساتىپ الىنىپتى. ول كۇنىنە 500-دەن 2 مىڭعا دەيىن جۇمىرتقا سالادى. 18 كۇننەن كەيىن ول جۇمىرتقالاردان ارا شىعا باستايدى.