ەلوردادا بالالار جىلىنا وراي وتكىزىلگەن FAMILY STEAM CHALLENGE-2022 وتباسىلىق سايىسىنىڭ فينالدىق كەزەڭى قورىتىندىلاندى. بايقاۋدى «سەنىمەن بولاشاق» رەسپۋبليكالىق قوعامدىق بىرلەستىگى اقپارات جانە قوعامدىق دامۋ مينيسترلىگىنىڭ قولداۋىمەن STEAM LAB كومپانياسىمەن بىرلەسىپ ۇيىمداستىردى.
فينالعا دەيىن ىرىكتەۋ كەزەڭى وتكەن, مامىر ايىنىڭ 10-ى مەن 30-ى ارالىعىندا ونلاين رەجىمدەگى ىرىكتەۋ سىنىنا رەسپۋبليكا بويىنشا 444 وتباسى تىركەلدى. العاشقى كەزەڭدە قاتىسۋشىلار سايىستىڭ شارتىنا سايكەس قولجەتىمدى ماتەريالداردان STEAM LAB كومپانياسى كورسەتكەن جوبانى (گيدراۆليكالىق كران) ازىرلەۋ بارىسىن بەينەروليككە ءتۇسىرىپ, ينستاگرام پاراقشالارىنا جۇكتەدى. ارنايى كوميسسيا ءار بەينەروليكتى قاراپ, جۇمىستىڭ ساپاسىنا, ۋاقىتىنا, اتا-انا مەن بالا اراسىنداعى قارىم-قاتىناسقا قاراي باعالادى. ناتيجەسىندە, ءار وڭىردەن ۇزدىك دەپ تانىلعان 16 جوبا ەكىنشى فينالعا جولداما الدى. ءبىرىنشى كەزەڭ جەڭىمپازدارىنا «سەنىمەن بولاشاق» رقب 100 مىڭ تەڭگە كولەمىندە اقشالاي سىيلىقتار تابىستادى.
جارىسقا قاتىسۋشىلار فينالدا 150 دانا اعاش تياقشالاردى ىستىق جەلىممەن بىرىكتىرە وتىرىپ, 90 مينۋت ىشىندە مىقتى كوپىر قۇراستىرىپ شىعۋدان باق سىناستى. مۇندا وتباسى مۇشەلەرىنىڭ ۇيىمشىلدىعى, ءبىر-ءبىرىن قولداۋى ۇلكەن ءرول وينادى. بايقاۋدى ۇيىمداستىرعان بىرلەستىكتىڭ توراعاسى راقىمبەك قۋاتبەك ۇلى اتالعان ءىس-شارا بالالاردىڭ كانيكۋلداعى بوس ۋاقىتىن پايدالى ءارى قىزىقتى وتكىزۋ ماقساتىندا ۇيىمداستىرىلعانىن ايتادى.
«بۇل بايقاۋ وسىناۋ اتاۋلى جىلدا بالالاردى قولداۋ, ەڭبەككە باۋلۋ, ولارعا ۇلتتىق قۇندىلىقتاردى ناسيحاتتاۋ, جاس ۇرپاقتىڭ تەحنيكالىق عىلىمدارعا دەگەن سۇيىسپەنشىلىگىن, ومىرگە قۇلشىنىسىن ارتتىرۋ ماقساتىندا ۇيىمداستىرىلدى. سايىس ارقىلى وقۋشىلاردىڭ كانيكۋلداعى ۋاقىتىن پايدالى ءارى قىزىقتى وتكىزۋگە, وتباسى مۇشەلەرىنىڭ اراسىنداعى جاقسى قارىم-قاتىناستى نىعايتۋعا اتسالىسۋدى كوزدەدىك. STEAM تەحنولوگياسى ەلىمىزگە بىرنەشە جىل بۇرىن كەلسە دە, وسى تۋرالى اتا-انالار كوپ بىلە بەرمەيدى. سونىڭ پايداسىن, قولجەتىمدى نارسەلەردەن, ءتىپتى تۇرمىستاعى قاجەتسىز زاتتاردان دا تانىمدىق, قاجەتتى دۇنيە جاساۋعا بولاتىنىن كورسەتكىمىز كەلدى», دەيدى ر.قۋاتبەك ۇلى.
وتباسىلىق سايىس قورىتىندىسى بويىنشا اتىراۋ وبلىسىنان كەلگەن مەرۋەرت وتاشەۆا مەن قىزى ادەمى جۇماباي ءبىرىنشى ورىنعا جانە 500 مىڭ تەڭگە سىياقىعا يە بولدى. ال نۇر-سۇلتان قالاسىنان قاتىسقان سالتانات ۋماشەۆا مەن بالاسى يسلام كەرەمحانعا ەكىنشى ورىن مەن 300 مىڭ تەڭگە بۇيىرسا, شىمكەنت قالاسىنان كەلگەن سەرىك ايتۋاروۆ پەن قىزى كاۋسار الىپبەك 200 مىڭ تەڭگە اقشالاي سىيلىقپەن 3 ورىنعا تۇراقتادى.
ءبىرىنشى ورىن يەلەنگەن اتىراۋلىق مەرۋەرت وتاشەۆا: «قازىر تەحنيكا مەن تەحنولوگيا سانامىزدى تۇرمىسىمىزدى جاۋلاپ العان زامان بولىپ تۇر. تەلەفونعا تەلمىرگەن بالا اتا-اناسىنان اجىراپ كەتەدى. ال وسىنداي سايىس اتا-انا مەن بالانىڭ اراسىن جاقىنداتا تۇسەدى ەكەن. سوعان كوزىمىز جەتتى. سوندىقتان مۇنداي بايقاۋلار كوپ بولعانىن قالايمىن», دەيدى.