«دەنى ساۋ ۇلت» ۇلتتىق مەديتسينالىق سامميتىنە قاتىسقان پرەمەر-ءمينيستردىڭ ورىنباسارى ەرالى توعجانوۆ مەديتسينا سالاسىنىڭ قىزمەتكەرلەرىن مەملەكەتتىك ناگرادالارمەن ماراپاتتادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ءىس-شاراعا مەملەكەتتىك ورگانداردىڭ قىزمەتكەرلەرى, مەديتسينالىق قوعامداستىق وكىلدەرى جانە ەلىمىزدىڭ عالىمدارى قاتىستى.
ۆيتسە-پرەمەر مەملەكەت باسشىسىنىڭ مەديتسينا قىزمەتكەرلەرى كۇنىنە وراي رەسمي قۇتتىقتاۋىن وقىپ بەردى.
ۆيتسە-پرەمەر ءوز سوزىندە مەملەكەت باسشىسىنىڭ قولداۋىنىڭ ارقاسىندا ەلىمىزدەگى مەديتسينا دەڭگەيى جىل سايىن دامىپ كەلە جاتقانىن اتاپ ءوتتى.
سونداي-اق كوروناۆيرۋس ينفەكتسيامەن كۇرەستە الدىڭعى شەپتە جۇرگەن ءاربىر مەديتسينا قىزمەتكەرىنىڭ قاجىرلى ەڭبەگىنىڭ ارقاسىندا ەلدىڭ تۇراقتى الەۋمەتتىك-ەكونوميكالىق دامۋى قامتاماسىز ەتىلگەنىن اتاپ ءوتتى.
«مەملەكەت مەديتسينا قىزمەتكەرلەرىن قولداۋ بويىنشا بىرقاتار شارالار قابىلداپ جاتىر. جالاقى ءوستى, حالىقارالىق ستاندارتتارعا سايكەس كەلەتىن ەڭبەك جاعدايلارى جاسالدى. ءبىز دەنساۋلىق ساقتاۋ جۇيەسىندەگى جەتىستىكتەرىمىزدى ماقتان تۇتامىز, بىراق بۇنىمەن شەكتەلمەيمىز. مەديتسينا قىزمەتكەرلەرى جۇمىسىنىڭ ناتيجەلەرى تىكەلەي الەۋمەتتىك اسەرگە يە ەكەنىن اتاپ وتكىم كەلەدى, وعان ناقتى ادامداردىڭ ءومىرى عانا ەمەس, جالپى قوعامنىڭ تۇراقتىلىعى دا تاۋەلدى», دەدى ەرالى توعجانوۆ.
سونىمەن قاتار ول پاندەميا ەلدى ۆاكتسينالارمەن, ءدارى-دارمەكپەن جانە زاماناۋي مەديتسينالىق جابدىقتارمەن قامتاماسىز ەتۋ قاجەتتىلىگىن كورسەتكەنىن ايتتى.
«سونىمەن قاتار ءبىز الدىمىزعا 2025 جىلعا قاراي وتاندىق وندىرىستەگى دارىلىك زاتتار مەن مەديتسينالىق بۇيىمداردىڭ ۇلەسىن 17-دەن 50%-عا دەيىن ارتتىرۋ جونىندە ناقتى مىندەت قويدىق. ول ءۇشىن ۇكىمەت دەڭگەيىندە ارنايى كەشەندى جوسپار قابىلداندى. COVID-19 پاندەمياسى كەزەڭىندە دەنساۋلىق ساقتاۋ جۇيەسىنىڭ ولقىلىقتارىن ەسكەرە وتىرىپ, ءبىز ەپيدەميولوگيالىق بولجاۋ مەن دەن قويۋدىڭ قازىرگى زامانعى جۇيەسىن قالىپتاستىرۋعا باعىتتالعان جۇمىستى كۇشەيتتىك. مەملەكەت باسشىسىنىڭ تاپسىرمالارىن ىسكە اسىرۋ اياسىندا «بيولوگيالىق قاۋىپسىزدىك تۋرالى» قر زاڭى قابىلداندى», دەپ اتاپ ءوتتى ە. توعجانوۆ.
ءىس-شارا بارىسىندا قر دەنساۋلىق ساقتاۋ ءمينيسترى اجار عينايات دارىگەرلەردى مەرەكەمەن قۇتتىقتادى. ول ەلىمىزدىڭ مەديتسينا قىزمەتكەرلەرىنىڭ اتىنان مەملەكەت باسشىسى مەن ەل ۇكىمەتىنە مەديتسينا سالاسىن قولداعانى ءۇشىن العىس ايتتى.
ەرالى توعجانوۆ ءوز ءسوزىن قورىتىندىلاي كەلە, مەديتسينا قىزمەتكەرلەرىنە كاسىبي شەبەرلىگى مەن كۇندەلىكتى قاجىرلى ەڭبەگى ءۇشىن تاعى العىس ءبىلدىردى.