باس ءمۇفتي رەسپۋبليكالىق ازانشىلار جارىسىن قورىتىندىلادى

فينالدىق كەزەڭنەن كەيىن جۇزدەن جۇيرىك شىققان جەڭىمپازدار مەن جۇلدەگەرلەردى قمدب توراعاسى, باس ءمۇفتي ناۋرىزباي قاجى تاعان ۇلى ارنايى ماراپاتتاپ, بارلىق قاتىسۋشىعا العىسىن ءبىلدىردى.

«ادەمى اۋەزدى ازانشىلارىمىزدىڭ رەسپۋبليكالىق سايىسى العاش رەت 2009 جىلى ەلوردادا وتسە, ودان كەيىن الماتى مەن اقتوبەدە, 2020 جىلى ماڭعىستاۋ جەرىندە ءوتتى. قۇراندى جاتقا وقۋدان وتەتىن رەسپۋبليكالىق بايقاۋلار قاريلارىمىزدى ەلگە تانىتىپ جاتسا, ازانشىلار جارىسى دا ادەمى اۋەزدى ءدىن قىزمەتكەرلەرىنىڭ كوپشىلىككە تانىلۋىنا جول اشىپ كەلەدى. قاراپايىم عانا اۋداندىق, اۋىلدىق مەشىتتەردە قىزمەت ىستەپ جۇرگەن يمامداردىڭ ۇلكەن قالالاردىڭ ورتالىق مەشىتتەرىندە ازان ايتۋىنا مۇمكىندىك بەرەدى», دەدى باس ءمۇفتي.

ەلىمىزدىڭ ءار ايماعىنان قاتىسقان 20 ازانشىنىڭ ىشىنەن قۋانىش باكەن ۇلى (تۇركىستان وبلىسى) توپ جارىپ, بەسىنشى رەت وتكەن رەسپۋبليكالىق جارىستىڭ جەڭىمپازى اتاندى. ءىى ورىن كوپشىلىككە تانىمال ءدىن قىزمەتكەرى, الماتىلىق ازانشى قاسىم اشىموۆكە بۇيىرسا, اتىراۋدان كەلگەن سالامات يمانعاليەۆ جۇلدەلى ءىىى ورىننان كورىندى. ال ءابدىمۇتالىپ جوراقۇل ۇلى (ماڭعىستاۋ وبلىسى) مەن ەلوردادان كەلگەن ەربولات شاۋدىرباي ىنتالاندىرۋ سىيلىعىنا يە بولدى. سونداي-اق جارىسقا قاتىسۋشىلاردىڭ اراسىندا ەڭ ەگدە جاستاعى ازانشى, الماتى قالاسىنداعى «فەرالي فەرعان ۇلى» مەشىتىنىڭ ۇستازى ابدۋلعاففار سيروجيددين «كورەرمەن كوزايىمى» نوميناتسياسىنا يە بولدى.

جەڭىمپازدار مەن جۇلدەگەرلەرگە قارجىلاي سىيلىق تابىستالسا, بارلىق قاتىسۋشىعا باس ءمۇفتيدىڭ العىس حاتى مەن اقشالاي سىياقى تابىستالدى.