ەلوردادا «دەنى ساۋ ۇلت» ۇلتتىق مەديتسينالىق ءسامميتى وتەدى

مەديتسينا قىزمەتكەرى كۇنىن مەرەكەلەۋ قارساڭىندا جانە پرەزيدەنتتىڭ «جاڭا قازاقستان» يدەياسىنىڭ شەڭبەرىندە ىسكە اسىرىلاتىن ءىس-شارانىڭ ۇيىمداستىرۋشىلارى  دەنساۋلىق ساقتاۋ مينيسترلىگى جانە «ALTYN SHIPAGER» ۇلتتىق مەديتسينالىق سىيلىعىنىڭ ۇيىمداستىرۋ كوميتەتى.

سامميتكە پرەزيدەنت اكىمشىلىگى, ۇكىمەت  مۇشەلەرى, ەلدىڭ مەديتسينا جۇرتشىلىعىنىڭ وكىلدەرى, بيزنەسمەندەر, دەنساۋلىق ساقتاۋ سالاسىنداعى  وتاندىق جانە شەتەلدىك ساراپشىلار قاتىسادى.

«مەديتسينالىق  سامميت بارىسىندا  دارىلىك زاتتار, مەديتسينالىق جابدىقتار,  مەديتسينالىق ماقساتتاعى بۇيىمدار  وندىرۋشىلەرىنىڭ, يمپورتەرلەردىڭ جانە ديستريبيۋتورلاردىڭ, فارماتسەۆتيكالىق كومپانيالاردىڭ, مەديتسينالىق مەكەمەلەردىڭ,  مەملەكەتتىك  جانە مەملەكەتتىك ەمەس ۇيىمداردىڭ, مەديتسينا سالاسىندا جۇمىس ىستەيتىن قىزمەتكەرلەردىڭ,  عىلىمي ينستيتۋتتاردىڭ, زەرتحانالاردىڭ جانە تاعى باسقالاردىڭ قاتىسۋىمەن رەسپۋبليكالىق اۋقىمدى كورمە وتەدى», دەلىنگەن حابارلامادا.

سونداي-اق, وتاندىق جانە شەتەلدىك سپيكەرلەردىڭ, مەديتسينا سالاسىنداعى, مەنەدجمەنت جانە دەنساۋلىق ساقتاۋ جۇيەسىن ستراتەگيالىق دامىتۋ سالاسىنداعى ساراپشىلاردىڭ قاتىسۋىمەن TEDx فورماتىندا «Health&Talks» ديالوگ الاڭىنىڭ وتىرىسى وتەدى.

جىل سايىنعى ALTYN SHIPAGER  ۇلتتىق مەديتسينالىق سىيلىعى دا وسى سامميت اياسىندا تابىس ەتىلەدى.