شىمكەنتتە قاڭتار ايىنداعى جاپپاي تارتىپسىزدىك كەزىندە قارۋ ۇرلاعان ءۇش كۇدىكتى ۇستالدى. پوليتسيانىڭ مالىمەتىنشە, ولاردىڭ بارلىعى قاماۋدا, دەپ حابارلايدى Egemen.kz.
قالالىق پد تەرگەۋ باسقارماسىنىڭ باستىعى داۋلەتكەلدى ابدرامانوۆ ولاردىڭ ەكەۋى الماتىدا پاتەر جالداپ تۇرعانىن, ال ءۇشىنشىسى ولارعا قوناققا كەلگەنىن اتاپ ءوتتى.
قارۋ-جاراق دۇكەنى تۇرعىن ءۇيدىڭ ءبىرىنشى قاباتىندا ورنالاسقان, ال جاس جىگىتتەر جاعدايدى پايدالانىپ, ۇرلىق جاساۋعا شەشىم قابىلدادى.
پوليتسيا دەرەكتەرىنە قاراعاندا, جىگىتتەر كوزگە تۇسكەن بارلىق قارۋدى ۇرلاپ, شىمكەنتكە قاشا جونەلدى.
ولار «سايگا» اڭشىلىق مىلتىعىنىڭ 2 داناسى مەن 70 پاتروندى ساتسا, تيرگە ارنالعان مىلتىقتى وزدەرىنە قالدىرعان.
«دەرەك قر قك-ءنىڭ 291-بابى «قارۋ ۇرلاۋ» بويىنشا سدتبت-دە تىركەلدى. كۇدىكتىلەردىڭ ۇشەۋى دە تۇركىستان وبلىسىنىڭ تۇرعىندارى. قازىر ولار قاماۋدا», دەدى داۋلەتكەلدى ءابدىرامانوۆ.
دەپارتامەنتتىڭ باس تەرگەۋشىسى زاڭسىز ساقتالعان قارۋدى, وق-دارىلەردى جانە جارىلعىش زاتتاردى ءوز ەركىمەن تاپسىرعان ادامداردىڭ ءىس-ارەكەتتەرىندە وزگە قىلمىستار بولماسا, قىلمىستىق جانە اكىمشىلىك جاۋاپكەرشىلىكتەن بوساتىلاتىنىن اتاپ ءوتتى.