قازاقستان پرەزيدەنتى قاسىم-جومارت توقاەۆ قازاقستانداعى ورىس تىلىنە قاتىستى پىكىر ءبىلدىردى, دەپ حابارلايدى Egemen.kz.
«قازاقستاندا ورىس ءتىلىنىڭ پوزيتسياسى كەمىدى, تارىلىپ بارا جاتىر دەگەن سوزدەر شىندىقتان وتە الشاق. مۇنداي پايىمنىڭ بارلىعى بەلگىلى ءبىر جاعدايدى ساياسيلاندىرۋ ماقساتىندا ايتىلعان. نەگىزىندە ونىڭ جاۋابىن بىلەمىن. بىراق بۇل قازىرگى سۇحباتىمىزدىڭ تاقىرىبى ەمەس. تولىقتاي العاندا, قازاقستاندا ورىس ءتىلىنىڭ پوزيتسياسى قانداي دا ءبىر ناشارلاۋعا ۇشىراعان جوق. وعان سەنىمدىمىن. ساباق ورىس تىلىندە وتەتىن مەكتەپتەردىڭ سانىنا قاتىستى ايتار بولسام, ولار بۇرىنعى كولەمدە قالدى», دەدى قاسىم-جومارت توقاەۆ رەسەيلىك جۋرناليست اندرەي كوندراشوۆقا بەرگەن سۇحباتىندا.
سونداي-اق مەملەكەت باسشىسى قازاق تىلىنە دەگەن سۇرانىستىڭ ارتىپ كەلە جاتقانىن ايتىپ ءوتتى.
«تۇپتەپ كەلگەندە, مەملەكەتىمىزدىڭ اتاۋىنىڭ وزىندە «قازاق» ءسوزى بار. ياعني, ءبىز قازاق ءتىلىن ۇيرەنگىسى كەلەتىن, بالاسىن قازاق مەكتەبى مەن بالاباقشاعا بەرگىسى كەلەتىن ادامداردىڭ مۇددەسىن قامتاماسىز ەتۋگە ءتيىسپىز. ورىس ءتىلىنسىز قازاقتارعا وتە قيىن بولاتىندىعىنا قاتىستى ناقتى تۇسىنىگىمىز بار. قازاقتار ورىس ءتىلىن جاقسى ءبىلۋى كەرەك. بىراق ءوزىنىڭ انا ءتىلىن دە ءبىلۋى ءتيىس», دەدى پرەزيدەنت.