ماجىلىستە «وسىمدىكتەر دۇنيەسى تۋرالى» قازاقستان رەسپۋبليكاسى زاڭ جوباسى ماقۇلداندى, دەپ حابارلايدى Egemen.kz.
زاڭ جوباسىن قر ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ تانىستىردى.
«قۇرمەتتى دەپۋتاتتار! زاڭ جوباسىن قابىلداۋداعى ماقسات – رەسپۋبليكانىڭ بۇكىل اۋماعىندا وسىمدىكتەر دۇنيەسىن قورعاۋ, مولايتۋ جانە ۇتىمدى پايدالانۋ سالاسىنداعى قاتىناستاردى قۇقىقتىق رەتتەۋ. قازىرگى ۋاقىتتا وسىمدىكتەر دۇنيەسىن پايدالانۋدى رەتتەۋگە بايلانىستى جەكەلەگەن نورمالار قر ورمان, ەكولوگيا, جەر, سۋ, كاسىپكەرلىك كودەكستەرىن, «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» جانە «ەرەكشە قورعالاتىن تابيعي اۋماقتار تۋرالى» قر زاڭدارىن قامتيدى. وسىعان بايلانىستى «وسىمدىكتەر دۇنيەسى تۋرالى» ارنايى زاڭدى قابىلداۋ قاجەتتىگى بار, ول قازاقستان راتيفيكاتسيالاعان حالىقارالىق كونۆەنتسيالاردىڭ ەرەجەلەرىنە دە نەگىزدەلگەن», دەدى مينيستر ءماجىلىستىڭ جالپى وتىرىسىندا.
ونىڭ ايتۋىنشا, زاڭ جوباسىن ازىرلەۋ كەزىندە حالىقارالىق تاجىريبە ەسكەرىلدى.
وسىمدىكتەر دۇنيەسى تۋرالى وزگە دە ۇقساس زاڭدار اۋستراليادا, كانادادا, وڭتۇستىك كورەيادا جانە ەۋروپالىق وداق ەلدەرىندە, قازاقستان قابىلداعان حالىقارالىق كونۆەنتسيالاردىڭ, ال جاقىن شەت ەلدەردە – ارمەنيا, بەلارۋس, قىرعىزستان, تۇرىكمەنستان, وزبەكستان جانە ۋكراينادا بار.
زاڭ جوباسىن رەتتەۋ سالاسى تابيعي جاعدايلاردا وسەتىن وسىمدىكتەر دۇنيەسى وبەكتىلەرىن, سونداي-اق گەنەتيكالىق قوردى ساقتاۋ ماقساتىندا ارنايى جاعدايلاردا ۇستالاتىن جابايى وسىمدىكتەر مەن ولاردىڭ بولىكتەرىن قامتيدى.
«وسىمدىكتەر دۇنيەسى تۋرالى» زاڭ جوباسىنىڭ ەرەجەلەرى اۋىل شارۋاشىلىعى وسىمدىكتەرىنە, سونداي-اق ءۇي ماڭىنداعى, ساياجاي جانە باۋ-باقشا ۋچاسكەلەرىندەگى وسىمدىكتەر دۇنيەسى وبەكتىلەرىنە قولدانىلمايدى.
«زاڭ جوباسىندا وسىمدىكتەر دۇنيەسى وبەكتىلەرىن تۇگەندەۋ, مەملەكەتتىك مونيتورينگ جانە كاداستر ءتارتىبى ايقىندالادى. بۇل رەسپۋبليكانىڭ بۇكىل اۋماعىندا وسىمدىك رەسۋرستارىنىڭ ەسەبىن جۇرگىزۋگە, ولاردىڭ ساندىق جانە ساپالىق سيپاتتامالارىنىڭ وزگەرىستەرىنە تالداۋ جاساۋعا, سونداي-اق وسىمدىكتەر دۇنيەسى وبەكتىلەرىن ەكونوميكالىق باعالاۋعا مۇمكىندىك بەرەدى. عىلىمي ۇيىمدار بەرگەن ۇسىنىستار نەگىزىندە اۋدانداستىرىلعان اعاش تۇرلەرى, بۇتالار, سونداي-اق ءشوپتى وسىمدىكتەر ارقىلى جاسىل جەلەكتەردى قۇرۋ ءتارتىبى بەلگىلەنەدى», دەپ قوستى مينيستر.
سونىمەن بىرگە, زاڭ جوباسىندا وسىمدىكتەر دۇنيەسى وبەكتىلەرىن ينترودۋكتسيالاۋعا جانە بۋدانداستىرۋعا قويىلاتىن تالاپتار, تابيعي وسىمدىكتەر قوعامداستىعىنا قاتەر توندىرەتىن وسىمدىكتەردىڭ بوتەن تەكتى تۇرلەرىن ەنگىزۋگە تىيىم سالۋ بەلگىلەنەدى.
مەملەكەتتىك ورگاندار مەن قوعامدىق ۇيىمدار جۇرگىزەتىن مەملەكەتتىك جانە قوعامدىق باقىلاۋ ينستيتۋتتارى ەنگىزىلۋدە.
«زاڭ جوباسىنىڭ نەگىزگى جاڭالىعى – وسىمدىك الەمىنىڭ جەكەلەگەن تۇرلەرىنىڭ اينالىسى سالاسىندا حابارلاما جاساۋ ءتارتىبىن بەلگىلەۋ. بۇل وتاندىق كاسىپكەرلىك سۋبەكتىلەرىنىڭ فارماتسەۆتيكالىق, ازىق-ت ۇلىك جانە تەحنيكالىق ونىمدەردى ءوندىرۋ ءۇشىن وسىمدىك رەسۋرستارىن زاڭدى نەگىزدە ۇتىمدى پايدالانۋ مۇمكىندىگىنە يە بولاتىنىن بىلدىرەدى. بۇل شارا شاعىن جانە ورتا بيزنەستى دامىتۋعا, وسى سالاعا ينۆەستيتسيالار تارتۋعا, سونداي-اق بيزنەس سۋبەكتىلەرىنىڭ وسىمدىكتەر دۇنيەسىن ارنايى پايدالانعانى ءۇشىن تولەماقى ەنگىزۋى ارقىلى مەملەكەتتىك بيۋدجەت كىرىستەرىن ۇلعايتۋعا مۇمكىندىك بەرەدى. سونىمەن بىرگە جەكە تۇلعالار جابايى جەمىستەردى, جاڭعاقتاردى, ساڭىراۋقۇلاقتاردى, جيدەكتەردى, دارىلىك شيكىزاتتى جانە وزگە دە وسىمدىك رەسۋرستارىن جەكە جانە ۇيدە پايدالانۋ ءۇشىن وتەۋسىز نەگىزدە جانە رۇقسات بەرۋ قۇجاتىنسىز جينايدى», دەپ ءتۇسىندىردى ەكولوگيا ءمينيسترى.
جالپى العاندا زاڭ جوباسى وسىمدىكتەر دۇنيەسى سالاسىنداعى جالپى مەملەكەتتىك مىندەتتەردى شەشۋدى كوزدەيدى جانە «وسىمدىكتەر دۇنيەسى تۋرالى» زاڭنىڭ نورمالارىن تولىق ىسكە اسىرۋ ءۇشىن ورمان, جەر, كاسىپكەرلىك, سالىق كودەكستەرىنە, «رۇقساتتار جانە حابارلامالار تۋرالى», «ەرەكشە قورعالاتىن تابيعي اۋماقتار تۋرالى» جانە «جايىلىمدار تۋرالى» زاڭدارعا تۇزەتۋ ەنگىزۋ تالاپ ەتىلەدى.