بۇگىن تاڭعى ساعات 03:00-دە باتىس ەۋروپا - باتىس قىتاي اۆتوجولىنىڭ 544-شاقىرىمىندا كەلە جاتقان «سكانيا» جۇك كولىگىنىڭ تىركەمەسى ورتەنىپ كەتتى, دەپ حابارلايدى Egemen.kz.
وبلىستىق پوليتسيا دەپارتامەنتىنىڭ ءباسپاسوز قىزمەتى حابارلاعانداي, ءورت جول قوزعالىسىنا كەدەرگى كەلتىرگەندىكتەن, اۆتوكولىكتەر توقتاتىلعان.
«ارتىنشا ساعات 03:40 كەزىندە جانىپ جاتقان تىركەمەگە 550-600 مەتر جەتپەي, DAF جۇك كولىگى جولدا ءبىر باعىتتا توقتاپ تۇرعان 10 كولىكتى قاعىپ كەتتى. ونىڭ ىشىندە ەكى جولاۋشىلار اۆتوبۋسى, ەكى «تويوتا كامري», «اۋدي 100», «شەۆرولە كوبالت», «دايملەر كرايسلەر», BMW X5, «تويوتا الفارد», «Audi 80» جەڭىل كولىكتەرى بولدى. سوقتىعىس سالدارىنان 4 اۆتوكولىك ورتەنىپ كەتكەن. «تويوتا كامري» اۆتوكولىگىنىڭ جولاۋشىسى وقيعا ورنىندا قايتىس بولدى. تاعى 9 ادام ءتۇرلى جاراقاتتارمەن قالالىق اۋرۋحاناعا جەتكىزىلدى. ونىڭ ىشىندە 3 ادام رەانيماتسيا بولىمىنە جاتقىزىلدى», دەدى ۆەدومستۆو وكىلى.
اتالعان فاكت بويىنشا قك 345-بابى 3-بولىگى بويىنشا سوتقا دەيىنگى تەرگەۋ باستالىپ, قاجەتتى ساراپتامالار تاعايىندالدى.
جامبىل وبلىسى اكىمدىگىنىڭ دەنساۋلىق ساقتاۋ باسقارماسى 12 ادامنىڭ زارداپ شەككەنىن حابارلادى. ونىڭ ەكەۋى جولدا ءوتىپ بارا جاتقان اۆتوكولىكپەن جۋالى اۋداندىق اۋرۋحاناسىنا, 10-ى تاراز قالالىق كوپبەيىندى اۋرۋحاناسىنا جاتقىزىلدى.
«جۋالى اۋداندىق ورتالىق اۋرۋحاناسىنىڭ جەتكىزىلگەن 2 ادامعا مەديتسينالىق كومەك كورسەتىلىپ, ۇيلەرىنە جىبەرىلدى. ال قالالىق كوپبەيىندى اۋرۋحاناسىنا تۇسكەن 10 ادامنىڭ 3-ەۋى وزبەكستان ازاماتتارى. زارداپ شەككەندەردىڭ ىشىنەن 5 ناۋقاس اۋرۋحاناعا جاتقىزىلدى. 4-ەۋى – رەانيماتسيا بولىمشەسىنە, 1 ازامات – تراۆموتولوگيا بولىمشەسىنە جىبەرىلدى. 5 ناۋقاس امبۋلاتورلىق ەم قابىلداۋعا ۇيلەرىنە قايتارىلدى», دەدى باسقارمانىڭ ءباسپاسوز قىزمەتكەرى تولقىن ومىرباەۆا.