قاراعاندى وبلىسىنىڭ پوليتسيا قىزمەتكەرلەرى ەسىرتكىنىڭ ءىرى پارتياسىن جەتكىزۋشىلەردىڭ جولىن كەسۋ ماقساتىندا ارنايى شارا وتكىزدى, دەپ حابارلايدى Egemen.kz.
وپەراتسيا بارىسىندا 198 كگ ماريحۋانا جانە 6 ملن تەڭگەدەن استام اقشا تاركىلەندى.
قاراعاندى وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جامبىل وبلىسىنىڭ ءۇش تۇرعىنى رەسپۋبليكا وڭىرلەرىنە ايتارلىقتاي كولەمدە ەسىرتكى جەتكىزۋمەن اينالىساتىنىن انىقتاعان.
«12 ماۋسىمدا «قاراسورا-2022» اۋقىمدى رەسپۋبليكالىق وپەراتسياسى اياسىندا جەدەل-تەرگەۋ شارالارى كەزىندە ەسىرتكى تاسىمالداۋ, ساقتاۋ جانە وتكىزۋ كۇدىگى بويىنشا 34, 39 جانە 56 جاستاعى ءۇش ەر ادام ۇستالدى. ونىڭ بارلىعى - جامبىل وبلىسىنىڭ تۇرعىندارى.
ۇستالعانداردان 6 ملن 435 مىڭ تەڭگە قولما-قول اقشا, وسىمدىك تەكتەس زات سالىنعان سەگىز قاپ تاركىلەندى. ساراپتاما قورىتىندىسىنا سايكەس, ول جالپى سالماعى 198 كگ كەپتىرىلگەن ماريحۋانا بولىپ شىقتى», دەپ حابارلادى قاراعاندى وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى باۋىرجان ميسساليموۆ.
اتالعان فاكتى بويىنشا قر قك 297-بابى 3-بولىگى بويىنشا قىلمىستىق ءىس قوزعالدى. ءتارتىپ ساقشىلارى تەرگەۋ جۇرگىزىپ جاتىر.
سونداي-اق كەشە تۇندە الماتى جانە تاراز قالالارىندا وسى توپتىڭ 3 ادامى ۇستالدى. ولاردان «Range Rover» جانە «لەكسۋس» اۆتوموبيلدەرى, قارۋ تاركىلەندى.