اقتوبە وبلىسىندا حالىقتىڭ 97 پايىزى اۋىزسۋمەن, 93 پايىزى – گازبەن قامتىلعان. بۇل تۋرالى اقتوبە وبلىسىنىڭ اكىمى وڭداسىن ورازالين ايتىپ بەردى, دەپ حابارلايدى Egemen.kz.
«بۇگىنگى كۇنى, وبلىس حالقىنىڭ 97,2% تازا اۋىزسۋمەن قامتاماسىز ەتىلگەن, اتاپ ايتقاندا, وتكەن جىلى ءبىز جالپى حالقى 5 مىڭ ادامدى قۇرايتىن 10 اۋىلدى سۋمەن قامتاماسىز ەتتىك. بيىل 23 مىڭعا جۋىق حالقى بار 11 اۋىلدى ورتالىقتاندىرىلعان اۋىزسۋمەن جانە 39 اۋىلدى كەشەندى بلوك-مودۋلدەرمەن قامتۋ جوسپارلانۋدا», دەدى و. ورازالين ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ءوز سوزىندە ءوڭىر اكىمى مەملەكەت باسشىسىنىڭ 2025 جىلى حالىقتىڭ 100%-ءىن ساپالى اۋىز سۋمەن قامتاماسىز ەتۋ مىندەتىن ەسكە سالدى.
«دەگەنمەن, قابىلدانىپ جاتقان شارالاردىڭ ارقاسىندا ءبىز بۇل كورسەتكىشتى 2023 جىلى ورىنداۋدى جوسپارلاپ وتىرمىز. كوگىلدىر وتىنمەن قامتۋ ماسەلەسىنە كەلسەك, 2021 جىلى 10 مىڭنان استام حالقى بار 16 اۋىلدى گازبەن قامتاماسىز ەتتىك. بيىل 9 اۋىلعا كوگىلدىر وتىن جەتكىزىپ, وبلىستاعى گازبەن قامتىلعان حالىق ۇلەسىن 93,4%-كە جەتكىزەمىز. بىراق بۇل جەردە تۇسىنىستىكپەن قاراۋىمىز كەرەك, بۇرىن قالا ماڭىنداعى, اۋدان ورتالىقتارى گازبەن قامتىلسا, قازىر شالعايداعى اۋىلدارعا گاز جەتكىزۋ مىندەتى تۇر. ەڭ ءىرى وبلىس بولعاندىقتان, سول اۋىلدارعا گاز جەتكىزۋ ءۇشىن كەمىندە 100-150 شاقىرىم گاز قۇبىرىن تارتۋ كەرەك. بۇل ۇلكەن قاراجاتتى قاجەت ەتەدى. دەگەنمەن, بۇل جۇمىستاردى جالعاستىرامىز», دەدى وڭداسىن ورازالين.