قارجىلىق مەحانيزمدەردىڭ دامۋىندا, جولعا قويىلۋىندا حالىقتىڭ ساۋاتى دا ۇلكەن ءرول وينايدى. تۇتىنۋشى كوبەيگەن كەزدە عانا ونلاين قىزمەتتىڭ شىرايى كىرمەك. ازاماتتاردىڭ قارجىلىق تۇرعىدان ساۋاتىنىڭ ارتۋى ءتۇرلى قارىم-قاتىناس پروتسەستەرىن جەڭىلدەتەدى ءھام جەدەلدەتەدى.
رەسپوندەنتتەر وزدەرىنىڭ قارجىلىق بىلىمىنە ورتا دەڭگەيدە سەنىمدى. 22 پايىزعا باعالانادى, بۇل تمد-داعى ورتاشا كورسەتكىشتەن (19 پايىز) جوعارى. سونداي-اق قازاقستان اقشانى قارجى مەكەمەلەرىندە, ونىڭ ىشىندە جيناقتاۋشى شوتتاردا جانە شۇعىل دەپوزيتتەردە ساقتاۋ جاعىنان دا كوش باستايدى. قارجىلىق ءبىلىم, قارجىلىق ساۋاتتىلىق جانە قارجىلىق قارىم-قاتىناس فاكتورلارى بويىنشا بەلارۋس پەن وزبەكستاننان كەيىنگى ءۇشىنشى ورىندا.
قارجىلىق ءبىلىم دەڭگەيىن باعالاۋ ءۇشىن قارجىلىق تۇجىرىمداماعا قاتىستى جاعدايلار ەسكەرىلگەن. ولار – ينفلياتسيا, قاراپايىم جانە جيناقتالعان پايىزدار, تاۋەكەلدەر, تاۋەكەلدەردىڭ ءارتاراپتاندىرىلۋى. ال قارجىلىق ءتارتىپ دەڭگەيىن انىقتاۋ ءۇشىن رەسپوندەنتتىڭ اقشا جيناۋمەن قانشالىقتى بەلسەندى اينالىساتىنى, اقشا جەتپەي قالعاندا نەسيەگە جۇگىنەتىن-جۇگىنبەيتىنى, الدىنا ۇزاق مەرزىمدى قارجىلىق ماقسات قوياتىنى-قويمايتىنى سۇرالعان.
اقشا جيناۋمەن قانشالىقتى مۇقيات اينالىساتىنى جانە ۇزاق مەرزىمدى جوسپارلارمەن تياناقتى جۇمىس ىستەي الۋى سۇرالىپ, سونىڭ ناتيجەسىندە ازاماتتاردىڭ قارجى ماسەلەسىنە قاتىستى قارىم-قاتىناس دەڭگەيى انىقتالعان. ەگەر ازامات اقشا جۇمساۋ ىسىنە كەلگەندە «بۇگىنگى كۇنمەن ءومىر سۇرەمىن دەسە», وندا وعان تومەن ۇپاي قويىلىپ وتىرعان.
قارجى نارىعىن رەتتەۋ جانە دامىتۋ اگەنتتىگىنىڭ تاپسىرىسىمەن جىل سايىن وتكىزىلەتىن الەۋمەتتىك زەرتتەۋ قورىتىندىسىندا دا ەل تۇرعىندارىنىڭ ساۋاتى ارتىپ كەلە جاتقانى ايتىلادى. 2021 جىلى ازاماتتاردىڭ قارجىلىق ساۋات يندەكسى 39,52 پايىزدى قۇراپ, 2020 جىلمەن سالىستىرعاندا (39,07 پايىز) 0,45 پايىزدىق تارماققا كۇشەيگەن. اسىرەسە, «جەكە قاراجاتىن باسقارۋ» سەگمەنتىندەگى دەڭگەي جوعارى بولىپ تۇر (42,57 پايىز).
ۇلتتىق ستاتيستيكا بيۋروسى تاراتقان دەرەككە سۇيەنسەك, بىلتىر تسيفرلى قۇرىلعىلار مەن ينتەرنەتتى مەڭگەرگەن 6-74 جاس ارالىعىنداعى ازاماتتار ۇلەسى 87,3 پايىزعا جەتكەن. بۇل كورسەتكىش 2020 جىلى – 84,1, 2019 جىلى – 82,1, 2018 جىلى 79,6 پايىز بولعان. وڭىرلىك بولىنىستە تسيفرلى ساۋاتتىلىق تۇرعىسىنان نۇر-سۇلتان (94,7 پايىز) مەن الماتى قالالارى (91,5 پايىز) جانە الماتى وبلىسى (91 پايىز) كوش باستايدى. ارينە, قازىر قارجىلىق وپەراتسيالاردىڭ باسىم بولىگى ينتەرنەت كومەگىمەن سمارتفون ارقىلى جاسالاتىندىقتان تسيفرلى ساۋاتتىلىقتىڭ ارتۋى قارجىلىق ساۋاتتىڭ مولايۋىنا تىكەلەي اسەرىن تيگىزەدى.