قازاقستان رەسپۋبليكاسىنىڭ ليۆانداعى ەلشىلىگى «قازاقستان-ليۆان قاتىناستارى: 20 جىلدىق تابىستى سەرىكتەستىك» كىتابىنىڭ تۇساۋىن كەستى.
قازاق, اراب جانە اعىلشىن تىلدەرىندە شىققان كىتاپتا ەكى ەل اراسىنداعى ديپلوماتيالىق قارىم-قاتىناس ورناتۋ تاريحى تۋرالى باياندالعان, ساياسي, ساۋدا-ەكونوميكالىق جانە مادەني بايلانىستار تۋرالى اقپارات ۇسىنىلعان. ەكى ەلدىڭ جوعارى لاۋازىمدى تۇلعالارى قازاقستان-ليۆان ىنتىماقتاستىعىنىڭ بولاشاعى تۋرالى ءوز پىكىرلەرىمەن بولىسكەن, سونداي-اق, كىتاپتا قوس ەلدىڭ قاتىناستارى دامۋىنىڭ حرونولوگيالىق فوتوماتەريالدارى جاريالانعان.
كىتاپتىڭ تۇساۋكەسەرى قازاقستاننىڭ ليۆاندا تۇراتىن كوپتەگەن دوستارىنىڭ باستارىن قوستى. اتاپ ايتقاندا, ءىس-شاراعا ۇكىمەت وكىلدەرى, پارلامەنتاريلەر, كورنەكتى ساياسي جانە قوعام قايراتكەرلەرى, شەتەل ديپلوماتتارى, بيزنەسمەندەر, جۋرناليستەر, سونداي-اق, قازاقستان-ليۆان دوستىق قوعامىنىڭ مۇشەلەرى قاتىستى.
قازاقستان رەسپۋبليكاسىنىڭ ليۆان رەسپۋبليكاسىنداعى ەلشىسى بولات سارسەنباەۆ ءوزىنىڭ سالەمدەمە سوزىندە ءبىرىنشى كەزەكتە ليۆاننىڭ ساياسي قايراتكەرلەرىنە ۇسىنىلعان كىتاپقا ەنگەن ەكى ەلدىڭ ىنتىماقتاستىعى تۋرالى جازعان جىلى پىكىرلەرى ءۇشىن العىسىن ءبىلدىردى. سونىمەن قاتار, بىرقاتار ماسەلەلەر بويىنشا ءوزارا تۇسىنىستىك پەن كەلىسىمنىڭ جوعارى دەڭگەيىنە ءمان بەرە وتىرا, قازاقستان مەن ليۆاننىڭ ءارتۇرلى سالالارداعى قول جەتكىزگەن جەتىستىكتەرىن اتاپ ءوتتى.
قابىلداۋعا قاتىسقان قوناقتار قىسقا مەرزىم ىشىندە جۇزەگە اسقان ەكى دوستاس مەملەكەت ىنتىماقتاستىعىنىڭ جوعارى دەڭگەيىن اتاپ ءوتتى.
«ەگەمەن-اقپارات».