ات ءتۋريزمىن قولداۋشى شاباندوزدار اقمولا جانە سولتۇستىك قازاقستان وبلىستارىنىڭ كيەلى جەرلەرىنە ساياحاتقا شىقتى, دەپ جازادى Egemen.kz.
جەتى كۇندىك ەكسپەديتسيانىڭ ماقساتى – بوزوق قالاشىعى مەن بوتاي مادەنيەتى سىندى جالپىۇلتتىق ماڭىزى بار ارحەولوگيالىق ەسكەرتكىشىن تانىمال ەتۋ, سونداي-اق قازاقستان اۋماعىندا ەكولوگيالىق ءتۋريزمدى ىلگەرىلەتۋ.
«بوزوقتان بوتايعا دەيىن» ەكسپەديتسياسىنىڭ باستالۋىنا ارنالعان ءىس-شاراعا مادەنيەت جانە سپورت ءمينيسترى داۋرەن اباەۆ, عالىمدار, At-trاvel كلۋبىنىڭ وكىلدەرى مەن قوعام بەلسەندىلەرى قاتىستى.
«وسى دالادا ادامزات العاش رەت اتتى قولعا ۇيرەتتى. بوتاي مادەنيەتى – سول ۇلى وركەنيەتتىڭ باستاۋى. بوزوق قالاشىعى – ەڭسەلى ەلوردامىزدىڭ التىن تامىرى. بۇل جەردە ۇلتتىق پارك قۇرۋ ارقىلى ءبىز كونە تاريحىمىزدى جاس ۇرپاققا ناسيحاتتايمىز. مادەنيەت جانە سپورت مينيسترلىگى اشىق اسپان استىنداعى ۇلتتىق مۋزەي قۇرىلىسىن كەزەڭ-كەزەڭمەن جۇزەگە اسىرۋدى كوزدەيدى. الداعى ۋاقىتتا دا «بوزوق» مۋزەي-قورىعىنىڭ جۇمىسى جاندانا بەرەدى. سولتۇستىك قازاقستان مەن اقمولا وبلىستارىنىڭ اراسىن اتپەن ءجۇرىپ وتەتىن ەكسپەديتسيانىڭ ءمانى ەرەكشە. وسىنداي ءىس-شارالار ارقىلى اتقا ءمىنۋدى ناسيحاتتايمىز, تاريحىمىزبەن تانىسامىز, ەكو-ءتۋريزمدى دامىتامىز. ەكسپەديتسيانى ۇيىمداستىرۋعا ۇلەس قوسقان بارشاڭىزعا العىس ايتامىن», – دەدى داۋرەن اباەۆ.
ءبىزدىڭ انىقتاما:
بوزوق – قازاقستاننىڭ قازىرگى استاناسى اۋماعىندا ورنالاسقان, 1250 جىلدىق تاريحى بار كونە قالاشىق. كەزىندە بوزوق ارقىلى ۇلى جىبەك جولىنىڭ ساۋدا تارماقتارى وتكەن.
بوتاي الەمدەگى – ەرتەدەگى ەۋرازيا جىلقى وسىرۋشىلەرىنىڭ بىرەگەي قونىسى. بۇل مادەنيەتتىڭ ءومىر ءسۇرۋ ۋاقىتى ب.ع.د. V-IV عاسىرلاردا ءوتتى. وندا جۇرگىزىلگەن زەرتتەۋلەردىڭ تاريحي ماڭىزى- جىلقىلاردى قولعا ۇيرەتۋدىڭ جەر جۇزىندەگى بىردەن ءبىر ورتالىعى قازاقستان ەكەنىن دالەلدەيدى.