موڭعوليانىڭ تۇڭعىش وليمپيادا چەمپيونى, دزيۋدوشى نايدانگين تۋۆشينبايار دوسىن ولتىرگەنى ءۇشىن 16 جىلعا سوتتالدى, دەپ حابارلايدى Egemen.kz Sonin اقپاراتتىق اگەنتتىگىنە سىلتەمە جاساپ.
وقيعا 2021 جىلى ساۋىردە بولعان. تۋۆشينبايار ماس كۇيىندە دوسىن وڭدىرماي ساباعان, ەر ادام العان جاراقاتتارى سالدارىنان بىرنەشە ايدان كەيىن كوز جۇمىپتى.
سوتتا تۋۆشينبايار كىناسىن مويىنداپ, بولعان جايتقا وكىنەتىنىن ايتقان. ونىڭ سوزىنشە, دوسى نايدانگيننىڭ ۇلكەن جەتىستىكتەرگە جەتۋىنە زور ۇلەس قوسقان ەكەن. سپورتشى كوز جۇمعان دوسىنىڭ وتباسىنا ءىرى سوممادا وتەماقى دا تولەپتى.
«مەن كىنالىمىن, سوت ماعان قاتىستى شەشىمىن شىعارسىن. مەن دوسىمنىڭ وتباسىنا ءومىر بويى كومەكتەسەمىن», دەدى ول.
ەسكە سالايىق, 100 كەلىدە بەلدەسكەن تۋۆشينبايار 2008 جىلى بەيجىڭدە موڭعوليا تاريحىندا العاش رەت وليمپيادا التىن مەدالىن جەڭىپ العان ەدى. ال 2012 جىلى «كۇمىس» جەڭىپ الىپ, وليمپيادانىڭ بىرنەشە جۇلدەسىن يەلەنگەن ءبىرىنشى موڭعوليالىق بولعان.