بۇل تۋرالى پرەزيدەنت جانىنداعى شەتەلدىك ينۆەستورلار كەڭەسىنىڭ 34-ءشى جالپى وتىرىسىندا ساۋدا جانە ينتەگراتسيا ءمينيسترى باقىت سۇلتانوۆ ايتتى, دەپ حابارلايدى Egemen.kz.
«ۇكىمەت شەتەلدىك سەرىكتەستەرىمەن كەلىسسوز جۇرگىزدى. قازىرگى ۋاقىتتا قۇپيالىلىق تۋرالى كەلىسىمگە قول قويىلدى. سونىمەن قاتار وتاندىق QazVac ۆاكتسيناسىن قىزىعۋشىلىق تانىتقان ەلدەردە ىلگەرىلەتۋ ماقساتىندا قۇجاتتاردى تولتىرۋ جۇمىسى قولعا الىنعان. بۇعان قوسا, QazVac-تى قىزىعۋشىلىق تانىتقان مەملەكەتتەردە تىركەۋ جۇمىسى جالعاسىپ جاتىر», دەدى باقىت سۇلتانوۆ.
مينيستر قازاقستان رەسپۋبليكاسىندا عىلىمدى دامىتۋدىڭ 2025 جىلعا دەيىنگى تۇجىرىمداماسى ازىرلەنىپ جاتقانىن ايتتى. اتالعان قۇجاتتا حالىقارالىق تەحنولوگيالىق كومپانيالاردا جۇمىس ىستەيتىن قازاقستاندىقتاردى, رەپاتريانتتاردى, بۇرىنعى قازاقستان ازاماتتارىن ىزدەۋ, ولاردىڭ وتانىنا ورالۋى ءۇشىن قولايلى جاعداي جاساۋ الگوريتمى قاراستىرىلادى.
«ۆيزا الۋعا ارنالعان قولداۋحات بەرۋ مەرزىمى 5-تەن 3 جۇمىس كۇنىنە دەيىن قىسقاردى. ۆيزالىق پورتال ارقىلى بىررەتتىك ە-ينۆەستورلىق ۆيزا راسىمدەۋ قىزمەتى جۇزەگە اسىرىلدى. بۇعان قوسىمشا, ينۆەستورلىق ۆيزا يەلەرىن جەرگىلىكتى اتقارۋشى ورگاندار جۇمىس ىستەۋگە رۇقسات تالاپ ەتپەيتىن تۇلعالار تىزىمىنە قوسۋ جۇمىسى جۇرگىزىلىپ جاتىر. تولىقتاي العاندا, بارلىق مەملەكەتتىك ورگان حاتتامالىق تاپسىرمالاردى ورىنداۋ جونىندەگى قاجەتتى ءىس-شارالاردى قابىلدادى», دەدى ول.