وڭتۇستىك افريكالىق بوكسشى سيميسو بۋتەلەزي 24 جاسىندا باس سۇيەك-مي جاراقاتىنان قايتىس بولدى, دەپ حابارلايدى Egemen.kz.
مالىمەت بويىنشا, 5 ماۋسىمدا بۋتەلەزي دۇنيەجۇزىلىك بوكس فەدەراتسياسىنىڭ (WBF) افريكا چەمپيونى بەلبەۋى ءۇشىن وتكەن جەكپە-جەكتەن كەيىن اۋرۋحاناعا جاتقىزىلعان. ول ونىنشى راۋندتا وتانداسى سيفەسيحلە منتۋنگۆانى نوكداۋنعا جىبەرگەن. بىراق قارسىلاسى قايتا تۇرىپ, جەكپە-جەكتى جالعاستىرۋعا دايىن ەكەنىن بىلدىرگەن. الايدا بۋتەلەزي اياق استى قاراما-قارسى باعىتقا بۇرىلىپ, اۋاعا سوققى جاساپ, كولەڭكەمەن جۇدىرىقتاسا باستاعان. تورەشى جەكپە-جەكتى دەرەۋ توقتاتىپ, جەدەل جاردەم شاقىرعان.
دارىگەرلەردىڭ ايتۋىنشا, اۋرۋحاناعا جەتكىزىلگەن بۋتەلەزيدىڭ ميىنا قان قۇيىلعان. سپورتشى كوماعا ءتۇسىپ, دارىگەرلەر قولدان كەلگەنىن جاساعان. بىراق وكىنىشكە قاراي, بۋتەلەزي ەسىن جيماستان كوز جۇمعان.
ايتا كەتسەك, بۋتەلەزي كاسىپقوي رينگتە ءتورت مارتە جەڭىسكە جەتىپ, ءبىر رەت جەڭىلىس تاپقان.
سالتانات كەنجەباي