بۇل كاسىبي مەرەكەنى دۇنيە جۇزىندەگى تاريح پاراقتارىن كوزىنىڭ قاراشىعىنداي ساقتاپ, بولاشاق ۇرپاققا امانات ەتەتىن ماماندار اتاپ وتەدى, دەپ حابارلايدى Egemen.kz.
مەرەكەنى ءدال وسى كۇنى بەلگىلەنۋى بەكەر ەمەس, سەبەبى 1948 جىلى يۋنەسكو-نىڭ شەشىمىمەن حالىقارالىق ارحيۆتەر كەڭەسى قۇرىلعان بولاتىن. ال 2007 جىلى قاراشادا كانادانىڭ كۆەبەك قالاسىنداعى باس اسسامبلەيادا «9 ماۋسىم – حالىقارالىق ارحيۆتەر كۇنى» دەپ رەسمي تۇردە بەكىتتى. ال قازاقستاندا ارحيۆشىلەر كۇنى 2020 جىلى ۇكىمەتتىڭ قاۋلىسىمەن 22 جەلتوقسان دەپ بەكىتىلگەن, ال رەسەيلىك ارىپتەستەر 10 ناۋرىزدا, بەلارۋستار 6 جەلتوقساندا, قىرعىز ەلىنىڭ ارحيۆشىلەرى 30 تامىزدا اتاپ وتەدى. ارحيۆ كۇنى ءار ەلدە ءتۇرلى ۋاقىتتا بەلگىلەنگەنىمەن, ءدال وسى كۇن الەمدەگى بارلىق ارحيۆشىلەردى بىرىكتىرەدى.
بۇل كاسىبي مەرەكەدە قازاقستان رەسپۋبليكاسى پرەزيدەنتىنىڭ ءارحيۆى دە قالىس قالمايدى. پرەزيدەنت ءارحيۆى مەملەكەت باسشىسىنىڭ 1994 جىلعى 14 قاڭتارداعى جارلىعىمەن بۇرىنعى ورتالىق مەملەكەتتىك قازىرگى زامان تاريحى ءارحيۆىنىڭ نەگىزىندە قۇرىلعان. بۇگىنگى تاڭدا ارحيۆتە 856 مىڭنان استام ءىستى قامتيتىن 1014 قور ساقتاۋلى. وندا 1918 جىلدان باستاپ ەلىمىزدىڭ ساياسي تاريحىنىڭ قۇجاتتارى بار. سونىمەن قاتار قوعام قايراتكەرلەرىنىڭ جەكە تەكتىك قۇجاتتارى مەن باسقارۋ قۇجاتتاماسى دا جيناقتالعان. تاۋەلسىزدىك العاننان كەيىنگى پرەزيدەنت اكتىلەرىنىڭ تۇپنۇسقالارى, حالىقارالىق جيىندارداعى بايانداما ماتىندەرى, فوتوسۋرەتتەرى دە ساقتاۋلى.
ەلىمىزدە قۇجاتتاردى قۇنتتايتىن 200-دەن اسا ارحيۆ بار, ولار قازاقستان رەسپۋبليكاسىنىڭ 1998 جىلعى 22 جەلتوقسانداعى «ۇلتتىق ارحيۆ قورى جانە ارحيۆتەر تۋرالى» زاڭىنا ساي جۇمىس ىستەيدى. جالپى ارحيۆتىك دەرەكتەر ادامزاتتىڭ ساياسي تاريحى, ەكونوميكالىق جانە الەۋمەتتىك دامۋىنىڭ قۇجاتتارىن جينايتىن نەگىزگى مەكەمە سانالادى. سوندىقتان ارحيۆتەر كۇنى سالا ماماندارىنىڭ كاسىبي مەرەكەسى عانا ەمەس, جالپى حالىقتىڭ نازارىن اۋدارۋ ءۇشىن بەلگىلەنگەن اتاۋلى داتا.
ايانا توعانبەك