قازاقكونتسەرتتىڭ جاس انشىلەرى مەملەكەتتىك رامىزدەردىڭ 30 جىلدىق مەرەيتويىنا وراي ەلوردالىقتارعا تاماشا تارتۋ جاسادى. «جاستار ءانى» اتتى مەرەكەلىك كونتسەرتتى ۇسىنعان جاس تالانتتار ەگەمەن ەلىمىزدىڭ جەتىستىكتەرىن ءان مەن جىرعا قوستى, دەپ حابارلايدى Egemen.kz.
بۇل كەشتە مۋزىكالىق ونەردە وزىندىك قولتاڭباسى قالىپتاسقان جاس ارتىستەر, حالىقارالىق بايقاۋلاردىڭ لاۋرەاتتارى ونەر كورسەتتى. كونتسەرتتىڭ شىمىلدىعى قازاق مۋزىكا ونەرىنە جاڭا تىنىس اكەلگەن «Saz&soul» توبىنىڭ انىمەن اشىلدى.
توپتىڭ سۇيەمەلدەۋىمەن ساحنادا گۇلسىم مىرزابەكوۆا, الىبەك الماديەۆ سالتانات مەڭدىعاليەۆا, ەربولات ناريمان ۇلى, ەربول تاجىباەۆ, رۋحيا بايدۇكەنوۆا, گۇلنار كوشەنوۆا, ديدار ابدۋحالىق سىندى بەلگىلى انشىلەر, حالىقارالىق بايقاۋلاردىڭ لاۋرەاتتارى مەن ەلىمىزگە تانىمال «مەلومەن» توبى ونەر كورسەتتى.
انشىلەردىڭ ورىنداۋىنداعى حالىق اندەرى, جاڭا اۆتورلىق تۋىندىلار مەن زاماناۋي ولەڭدەر ونەر سۇيەر قاۋىمنىڭ زور ىقىلاسىنا بولەندى. سالتاناتتى ءىس-شارا ءار كورەرمەنگە مەرەكەلىك كوڭىل-كۇي سىيلاپ قانا قويماي, تۋعان ەلگە, تاۋەلسىزدىكتىڭ سيمۆولى – رامىزدەرگە دەگەن پاتريوتتىق سەزىمىن ۇشتاي ءتۇستى.
«روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ءباسپاسوز قىزمەتى مالىمدەگەندەي, مەملەكەتتىك رامىزدەردىڭ 30 جىلدىعىنا ارنالعان مەرەكەلىك كونتسەرتتەر ماۋسىم ايىنىڭ سوڭىنا دەيىن جالعاسادى. الداعى ۋاقىتتا كورەرمەندەر «Astana Musical» تەاترىنىڭ «روزا باعلانوۆا», «شاڭىراق», «دوستار سەرتى» ميۋزيكلدەرىن, «حالىق قازىناسى» ونەر ءبولىمىنىڭ ارتىستەرى ۇسىناتىن ء«ان-كۇي قاناتىندا», «سىرلى اندەر – سىرلاسىم» كونتسەرتتەرىن تاماشالاي الادى.