استانا. 22 ءساۋىر.وڭتۇستىك كورەيادا «سەۆول» پارومىنىڭ اپاتقا ۇشىراۋى سالدارىنان قازا بولعاندار سانى 104 ادامعا جەتتى. بۇل تۋرالى Lenta.ru حابارلادى.
وقيعا ورنىندا جۇرگىزىلىپ جاتقان ىزدەۋ-قۇتقارۋ جۇمىستارى بارىسىندا تاعى 45 ادامنىڭ دەنەسى تابىلعان.
دۇيسەنبى كۇنى اپات ورنىنا قۇتقارۋشىلاردىڭ ارنايى جاساعى كەلىپ جەتتى. ولار ءتۇن باتقاندا جانە سۋدىڭ قاتتى اعىنىندا دا جۇمىستارىن توقتاتپايدى ەكەن. سونداي-اق قۇتقارۋشىلار سۋدىڭ ءۇش مىڭ مەترلىك تەرەڭدىگىنە دەيىن سۇڭگىپ بارا الادى.
«سەۆول» پارومىنىڭ اپاتقا ۇشىراۋىنا بايلانىستى تەرگەۋ امالدارى بارىسىندا 44 ادامعا تۇرعىلىقتى جەرىنەن ەشقايدا كەتپەۋ تالاپ ەتىلدى. ولاردىڭ قاتارىندا پاروم يەسى دە بار. پوليتسيا قىزمەتكەرلەرى قۇتقارىلعان كەمە جولاۋشىلارىنىڭ الەۋمەتتىك جەلىلەرگە جازعان مالىمدەمەلەرىنە سۇيەنە وتىرىپ, وسىنداي شەشىم قابىلداعان. تەرگەۋ امالدارى بارىسىندا جالپى جەتى ادام تۇتقىندالدى. ولاردىڭ اراسىندا جولاۋشىلاردى قۇتقارۋ ءۇشىن ءتيىستى شارالار قابىلداۋدىڭ ورنىنا, اپاتقا ۇشىراعان كەمەدەن العاشقىلاردىڭ ءبىرى بولىپ قاشقان كەمە كاپيتانى لي چجۋن سوك بار. كىناسى دالەلدەنگەن جاعدايدا ول ءومىر بويىنا تۇرمەگە قامالۋى مۇمكىن.
ەستەرىڭىزگە سالا كەتەيىك, «سەۆول» پارومى 16 ساۋىردە وڭتۇستىك كورەيانىڭ وڭتۇستىك-باتىس جاعالاۋىنداعى پيونپحۋندو ارالىنان 20 شاقىرىم جەردە اپاتقا ۇشىرادى. ينچحون پورتىنان چەدجۋدو ارالىنا قاراي باعىت العان كەمە بورتىندا 475 ادام بولعان. ازىرگە 198 ادام ءىز-ءتۇسسىز جوعالعاندار قاتارىندا قالىپ وتىر.
ايدار ورىسباەۆ.
دەرەككوز: Lenta.ru.
فوتو: Reuters.com.