اقمولا وبلىسى اۋماعىندا گەروين ەسىرتكىسىن ساتۋمەن اينالىسقان شورتاندى اۋدانىنىڭ 37 جاستاعى تۇرعىنى جانە 58 جاستاعى استانالىق ايەل سوتتالدى. نۇر-سۇلتان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ايىپتالۋشىلارعا قاتىستى ۇكىم شىعاردى, دەپ حابارلايدى Egemen.kz.
اقمولا وبلىستىق پد ءباسپاسوز قىزمەتىنىڭ مالىمەتىنشە, ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرىنە نۇر-سۇلتان قالاسى مەن شورتاندى اۋدانىنىڭ تۇرعىندارى وڭىرگە گەروين جەتكىزۋمەن اينالىسىپ جۇرگەندىگى تۋرالى اقپارات تۇسكەن.
جەدەل ىزدەستىرۋ ءىس-شارالارى بارىسىندا اقپارات راستالادى. كۇدىكتىلەردى ءتىنتۋ كەزىندە استانالىق ايەلدىڭ ءىش كيىمىنەن 595 گ گەروين تابىلىپ, تاركىلەندى. ال, ءۇيىن ءتىنتۋ كەزىندە 200 مىڭ تەڭگەدەن استام اقشا, ەلەكتروندىق تارازىلار, سارعىش ءتۇستى سۇيىقتىعى بار ينەكتسيالىق شپريتس جانە 845 گ گەروين سالىنعان پوليەتيلەن پاكەت تابىلدى. بارلىعى 1440 گ گەروين زاڭسىز اينالىمنان الىندى, بۇل - گەرويننىڭ 5000-نان استام ءبىر رەتتىك دوزاسى.
«قىلمىستىق كودەكستىڭ 297-بابى 3-بولىگى «وتكىزۋ ماقساتىندا ادامدار توبىنىڭ الدىن الا ءسوز بايلاسۋى بويىنشا جاسالعان اسا ءىرى مولشەردەگى ەسىرتكى زاتتارىن زاڭسىز ساتىپ الۋ, ساقتاۋ, تاسىمالداۋ» سانكتسياسىنا سايكەس مۇلكىن تاركىلەي وتىرىپ, 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان. سوت ۇكىمىمەن كۇدىكتىلەر 13 جانە 11 جىلعا باس بوستاندىعىنان ايىرىلدى», دەدى اقمولا وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى, پوليتسيا پولكوۆنيگى مەيرام جاپباسوۆ.