20 ماۋسىمنان باستاپ «باقىتتى وتباسى» تۇرعىن ءۇي باعدارلاماسىنا قاتىسۋعا ءوتىنىم قابىلدانا باستايدى, دەپ حابارلايدى Egemen.kz.
«اتالعان باعدارلاماعا كوپبالالى وتباسىلار, ەرەكشە قاجەتتىلىگى بار بالا تاربيەلەپ وتىرعان جانە تولىق ەمەس وتباسى (اجىراسقان ۋاقىتى 3 جىلدان كەم بولماۋى ءتيىس) ساناتىنا جاتاتىن مەملەكەتتىك پاتەر كەزەگىنە تۇرعان وتباسى بانكىنىڭ سالىمشىلارى قاتىسا الادى», دەپ حابارلايدى بانك ءباسپاسوز قىزمەتى.
ايتا كەتسەك, ءوتىنىم otbasybank.kz سايتى ارقىلى قابىلدانادى.
بۇعان دەيىن «باقىتتى وتباسى» باعدارلاماسىنا ءوتىنىم قابىلداۋ كەيىنگە شەگەرىلگەن ەدى.
«وتباسى بانكىنىڭ» باسقارما توراعاسى ءلاززات يبراگيموۆانىڭ ايتۋىنشا, اتالعان تۇرعىن ءۇي باعدارلاماسىن جۇزەگە اسىرۋعا بيۋدجەت ەسەبىنەن 51 ملرد تەڭگە بولىنگەن. باعدارلاما اياسىندا 5 مىڭعا جۋىق وتباسى باسپانالى بولادى دەپ كۇتىلۋدە.