سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى مۇگەدەك ادامداردىڭ ءومىر ءسۇرۋ ساپاسىن جاقسارتۋ ماسەلەلەرى جونىندەگى زاڭ جوباسىن تالقىلادى, دەپ حابارلايدى Egemen.kz.
قۇجاتتىڭ ماقساتى - مۇگەدەك ادامداردى الەۋمەتتىك قورعاۋ سالاسىنداعى زاڭنامانى جەتىلدىرۋ, سونداي-اق ەلىمىز راتيفيكاتسيالاعان كونۆەنتسيادان حالىقتىڭ ءتيىستى توبىنىڭ قۇقىقتارى تۋرالى كەمسىتۋشىلىك تەرمينولوگياسىن الىپ تاستاۋ, زاڭناماداعى ولقىلىقتىڭ ورنىن تولتىرۋ جانە مۇگەدەك ادامداردىڭ ءومىر ءسۇرۋ ساپاسى ماسەلەلەرىن رەتتەيتىن نورمالاردى سايكەستەندىرۋ.
زاڭ قابىلدانعان جاعدايدا الەۋمەتتىك قىزمەت كورسەتۋ سالاسىنداعى مەملەكەتتىك ساياسات جەتىلە تۇسەدى. زاڭ جوباسى سونىمەن قاتار مۇگەدەكتىكتى بەلگىلەۋ مەن ەكونوميكالىق دەربەستىكتى كەڭەيتۋ ءۇشىن مەديتسينالىق-الەۋمەتتىك ساراپتامادان ءوتۋ كەزىندە سىبايلاس جەمقورلىق تاۋەكەلدەرىن تومەندەتۋگە, سونداي-اق وڭالتۋ قىزمەتتەرىن جەتىلدىرۋگە ىقپال ەتەدى.
زاڭ جوباسىنا قر پارلامەنتىنىڭ دەپۋتاتتارى باستاماشى بولدى.
زاڭ جوباسىندا مۇگەدەك ادامداردى جانە حالىقتىڭ ءجۇرىپ-تۇرۋى شەكتەۋلى باسقا دا توپتارىن تاسىمالداۋ ءۇشىن تۇراقتى قالالىق تاسىمالعا دايىنداۋشى زاۋىت بەيىمدەپ جاساعان اۆتوبۋستاردى ساتىپ الۋ جونىندەگى مىندەتتى تالاپتى ەنگىزۋ, ءۇشىنشى توپتاعى مۇگەدەك ادامداردى قۇقىقتىق جانە تەحنيكالىق سيپاتتاعى نوتارياتتىق ىستەردى جاساۋ كەزىندە جەكە نوتاريۋستاردىڭ قىزمەتىنە اقى تولەۋدەن بوساتۋ جانە باسقا دا وزەكتى ماسەلەلەر بار.
سەناتورلار كوميتەتتىڭ كەڭەيتىلگەن وتىرىسىنىڭ قورىتىندىسى بويىنشا زاڭ جوباسىن پالاتانىڭ قاراۋىنا بەرۋ تۋرالى شەشىم قابىلدادى.