ۇلتتىق بانك تەڭگە باعامىنىڭ تۇراقتانۋىنا قاتىستى تۇسىنىك بەردى

بۇگىن ەلوردادا وتكەن ءباسپاسوز ءماسليحاتىندا تەڭگەنىڭ شەتەل ۆاليۋتاسىنا قاتىستى ءبىر دەڭگەيدە نىعايۋىنا قاتىستى ساۋال تۋىندادى.

قر ۇلتتىق بانكىنىڭ توراعاسى عالىمجان ءپىرماتوۆ وسى باعىتتا ۇلتتىق بانك ەركىن ايىرباس باعامى ساياساتىن ۇستاناتىنىن حابارلادى.

بۇل رەتتە, ءاليا مولدابەكوۆا اقپان ايىنان بەرى تەڭگە باعامىنىڭ قۇبىلمالىعى گەوساياسي تاۋەكەلدەر مەن جاھاندىق نارىقتاعى وزگەرىستەرگە بايلانىستى بولعانىن ايتتى.

«سوندىقتان ەركىن ايىرباس باعامى رەجيمىندە تۇرعان تەڭگەگە اتالعان جاعدايلار ىقپال ەتتى. ءبىزدىڭ ويىمىزشا, تەڭگەنىڭ ەركىن باعامى سىرتقى احۋالعا ەكونوميكامىزدىڭ ءارى نارىعىمىزدىڭ جىلدام بەيىمدەلۋىنە مۇمكىندىك بەرەدى. مامىر ايىنان باستاپ جاعداي تۇراقتاندى. بۇعان سىرتقى نارىقتارداعى احۋالدىق تۇراقتانۋى ىقپال ەتتى. قازىرگى كەزدە مۇنايدىڭ, ەنەرگيا رەسۋرستارىنىڭ باعاسى وسكەنىن بايقاپ وتىرمىز. بۇل رەسۋرستار ءبىزدىڭ ەكسپورتقا شىعاراتىن نەگىزگى تاۋارىمىز بولىپ وتىر», دەدى ءاليا مولدابەكوۆا.

ۇلتتىق بانك توراعاسىنىڭ ورىنباسارى اتالعان تۇراقتانۋ پروتسەسىنە ەكسپورتتاۋشىلار تاراپىنان شەتەل ۆاليۋتاسىنداعى ۇسىنىستارىنىڭ ارتۋى ىقپال ەتكەنىن اتاپ ءوتتى.

«سوندىقتان ۆاليۋتا نارىعىنداعى جاعداي تەڭدەستىرىلگەنىن كورىپ وتىرمىز», دەدى ول.