قارقارالى قالاسىندا وتكەن قازاقستان مۇسىلماندار ءدىني باسقارماسى عۇلامالار كەڭەسىنىڭ XXXIV ماجىلىسىندە بىرقاتار ماڭىزدى ءپاتۋالاردىڭ مازمۇنى تالقىلانىپ, ءماتىنى بەكىتىلدى, دەپ جازادى Egemen.kz.
اتاپ ايتقاندا, ەلىمىزدىڭ باس ءمۋفتيى ناۋرىزباي قاجى تاعان ۇلىنىڭ توراعالىق ەتۋىمەن وتكەن ماجىلىستە مونوپوليا ۇكىمى, مۇسىلمان ەمەس كىسىگە تۇرمىسقا شىعۋدىڭ ۇكىمى, بيرجادا اكتسيانى ساتىپ الۋ جانە ساتۋ ۇكىمى, قۇندى قاعازدان زەكەت بەرۋ ۇكىمى, احات ارقىلى نەكە قيۋدىڭ شاريعي ۇكىمى تاقىرىبىندا ازىرلەنگەن ءپاتۋالار كەڭەس مۇشەلەرىنىڭ ورتاق شەشىمىمەن قابىلداندى. ال ولاردىڭ تولىق ءماتىنى قازاقستان مۇسىلماندارى ءدىني باسقارماسىنىڭ رەسمي اقپارات قۇرالدارىندا جاريالاناتىن بولادى.
ەسكە سالساق, عۇلامالار كەڭەسى شاريعات, سالت-ءداستۇر نەگىزدەرىنە سۇيەنىپ, مۇسىلمان قاۋىمىن الاڭداتقان كوكەيكەستى, تۇيتكىلدى ماسەلەلەردى تالقىلاپ, ءپاتۋالار مەن تۇجىرىمداما قۇجاتتار قابىلدايدى.
كەڭەس جۇمىسىنىڭ اياسىندا باس مۋفتي ناۋرىزباي قاجى تاعان ۇلى قارقارالى اۋدانىنىڭ اكىمى ەرلان قۇسايىنمەن كەزدەسىپ, الداعى ۋاقىتتا قارقارالىعا قاتىستى ماسەلەلەرگە دە ءۇن قاتىپ, قولداۋ بىلدىرەتىنىن جەتكىزدى. اۋدان اكىمى باس مۋفتيمەن ارادا بولعان شاراپاتتى اڭگىمەنىڭ كوپتەگەن ماڭىزدى ماسەلەلەردىڭ باسىن شالعانىن اتاپ ءوتتى.
– ءبىر ساعاتقا سوزىلعان اڭگىمە بارىسىندا ءداستۇرلى يسلام ءدىنىنىڭ قۇندىلىقتارى, ءدىن مەن اتا ءداستۇر اراسىنداعى بايلانىستىڭ ۇزىلمەۋى جانە جاستاردىڭ بۇلدىرگى دىندەر جەتەگىندە كەتپەۋىنىڭ الدىن الۋ سياقتى وزەكتى ماسەلەلەر بويىنشا پىكىر الماستىق. الداعى ۋاقىتتا دا ىنتىماقتاستىق بايلانىستا بولۋ تۋراسىندا ۋاعدالاستىق, – دەيدى ە.قۇسايىن.
عۇلامالار كەڭەسىنىڭ جۇمىسىنا قاتىسقان ءدىن وكىلدەرى مەن تەولوگ ماماندار جيىن سوڭىندا قارقارالى قالاسىنىڭ تاريحي ورىندارىن ارالاپ, قۇنانباي قاجى مەشىتىنە ءتاۋ ەتتى.
ايتا كەتەتىن ءبىر جايت, مۇنداي دەڭگەيدەگى جيىننىڭ قاراعاندى وبلىسىنىڭ اۋماعىندا تۇڭعىش ءوتۋى جانە ونىڭ قاسيەتتى قارقارالىنىڭ تورىندە ۇيىمداستىرىلۋى وڭىردەگى ءدىن سالاسىنىڭ ومىرىندەگى ايتۋلى وقيعانىڭ ءبىرى بولدى.