ماجىلىستە وتكەن ۇكىمەت ساعاتىندا ەنەرگەتيكا ءمينيسترى بولات اقشولاقوۆ بيىل وڭىرلەردى گازعا قوسۋعا 95 ملرد تەڭگەدەن استام قاراجات قاراستىرىلعانىن ايتتى. ونىڭ 50,1 ملرد تەڭگەسى بيۋدجەتتى ناقتىلاۋ اياسىندا قوسىمشا ءبولىنىپ وتىر, دەپ حابارلايدى Egemen.kz.
«بۇگىنگى تاڭدا ىشكى گاز تۇتىنۋدىڭ كۇرت وسۋىنە جانە ەلدى ودان ءارى ۇزدىكسىز گازداندىرۋ ءۇشىن گاز تاسىمالداۋ جۇيەسىن جاڭعىرتۋ قاجەتتىلىگىنە بايلانىستى بۇگىنگى تاڭدا مينيسترلىك «قازاقگازبەن» بىرلەسىپ گازداندىرۋدىڭ باس سحەماسىن جاڭارتىپ جاتىر, ول اياقتالۋ ساتىسىندا.
«امانات» پارتياسىنىڭ جول كارتاسى اياسىندا مينيسترلىككە 2 تارماق بەكىتىلگەن. 2021 جىلدىڭ قورىتىندىسى بويىنشا 68 مىڭ ادامدى گازبەن قامتاماسىز ەتۋ جوسپارلانعان. جىل سوڭىندا 165,9 مىڭ ادام گازعا قول جەتكىزدى. جالپى 2021 جىلعا ارنالعان گازداندىرۋدىڭ جوسپارلىق كورسەتكىشى 53,71% بولسا, ناقتى دەڭگەي 57,67%-دى قۇرادى», دەدى ب.اقشولاقوۆ.
ونىڭ ايتۋىنشا, 2025 جىلعا دەيىن بيۋدجەت ەسەبىنەن 246 اۋىلدى گازبەن قامتاماسىز ەتۋ جوسپارلانعان. ازىرگە, سول جوسپار اياسىندا 187 ەلدى مەكەندى گازداندىرۋعا قاراجات بولىنگەن.
«بيىل ەلدى گازداندىرۋعا رەسپۋبليكالىق بيۋدجەتتەن 45,8 ملرد تەڭگە ءبولىندى. سونداي-اق 2022 جىلعا ارنالعان رەسپۋبليكالىق بيۋدجەتتى ناقتىلاۋ شەڭبەرىندە قوسىمشا 50,1 ملرد تەڭگە قولداۋ تاپتى. ناتيجەسىندە, 133 جوبانى ىسكە اسىرۋعا 96 ملرد تەڭگە قاراستىرىلعان. بۇل 146 مىڭ ادامدى نەمەسە 93 ەلدى مەكەندى گازبەن قامتاماسىز ەتۋگە مۇمكىندىك بەرەدى. 2022 جىلدىڭ قورىتىندىسى بويىنشا گازداندىرۋدىڭ جوسپارلانعان دەڭگەيى 58,43%-دى قۇراۋى كەرەك», دەدى مينيستر.