ەلوردا تۇرعىندارىمەن بىرگە ۇكىمەت مۇشەلەرى دە رەفەرەندۋمدا ءوز تاڭداۋىن جاسادى, دەپ حابارلايدى Egemen.kz.
اقپارات جانە قوعامدىق دامۋ ءمينيسترى اسقار ۋماروۆ تاڭعى ساعات 7:00-دە داۋىس بەرۋ ۋچاسكەسىندە كەزەكتە تۇرعانىن ايتىپ, Facebook-تە جازبا قالدىردى.
«بارىنەن ەرتە داۋىس بەرەمىن دەپ جوسپار قۇردىم كەشە. كەلسەم, الدىمدا ءبىراز ادام جينالىپ قالىپتى», دەپ جازدى ۆەدومستۆو باسشىسى.
تسيرفلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين دە ءوزىنىڭ داۋىس بەرگەن ساتىنەن Instagram-دا سۋرەت جاريالادى.
ء«وزىمىزدىڭ جانە كەلەشەك ۇرپاقتىڭ بولاشاعى ءۇشىن داۋىس بەردىك», دەپ جازدى مينيستر سۋرەتتىڭ استىنا.
سونداي-اق ءبىلىم جانە عىلىم ءمينيسترى اسحات ايماعامبەتوۆ قازاقستان ازاماتى رەتىندەگى كونستيتۋتسيالىق قۇقىعىن پايدالانعانىن ايتتى.
«رەفەرەندۋمعا قاتىسىپ, ءوز ۋچاسكەمدە داۋىس بەردىم. جالپى, داۋىس بەرۋ پروتسەسى وتە جاقسى ۇيىمداستىرىلعان. سايلاۋشىلاردىڭ بەلسەندى قاتىسۋىنا قاراماستان, كوميسسيا مۇشەلەرى جۇمىستارىن تياناقتى ىستەپ جاتىر. 2022 جىلعى 5 ماۋسىم قازاقستان تاريحىنداعى ماڭىزدى كۇندەردىڭ بىرىنە اينالاتىنىنا سەنىمدىمىن», دەپ جازدى ول Facebook-تەگى پاراقشاسىندا.