مەملەكەت باسشىسى قاسىم-جومارت توقاەۆ قاڭتار وقيعاسى كەزىندە قازا بولعانداردىڭ ءتىزىمى جاريالاناتىنىن ءمالىم ەتتى, دەپ حابارلايدى Egemen.kz.
«قازا بولعانداردىڭ تىزىمىنە قاتىستى ايتسام, ول جاريالانادى, كوپشىلىككە ءمالىم بولادى. بۇعان دەيىن ايتقانىمداي, ول تىزىمدە, لاڭكەستىك توپتىڭ دەپ ايتساق بولاتىن شىعار, سول تاراپتىڭ جاعىندا ءجۇرىپ قازا بولعاندار وتە كوپ. ولار ءوز ارەكەتتەرى ارقىلى مەملەكەتتىك قۇرىلىمىمىزدى ىدىراتقىسى كەلدى», دەدى قاسىم-جومارت توقاەۆ رەفەرەندۋمدا داۋىس بەرىپ بولعاننان كەيىن.
پرەزيدەنتتىڭ ايتۋىنشا, بۇل ماسەلەنىڭ ەكىنشى قىرى بار.
«بىراق مەملەكەتىمىزگە تابان استىنان قارسى شىققان توپتارعا قاتىسى بولماعان ادامدار دا بار. وسىعان بايلانىستى, ارينە, ءبىز قايعىرىپ, كوڭىل ايتامىز. ازاماتتارعا قارسى اقتاۋعا كەلمەيتىن ارەكەتتەرگە بارعان اسكەري قىزمەتشىلەردىڭ ءبارى جاۋاپكەرشىلىككە تارتىلاتىنى تۇسىنىكتى. تەرگەۋ ءجۇرىپ جاتىر, بالليستيكالىق ساراپتامالار ءوتىپ جاتىر. سوندىقتان ءبارى ايقىندالادى», دەدى مەملەكەت باسشىسى.