بۇل جولعى رەفەرەندۋمنىڭ 1995 جىلى وتكەن رەفەرەندۋمنان ءجونى بولەك. بۇل تۋرالى داۋىس بەرۋ ۋچاسكەسىندە ءوز تاڭداۋىن جاساعاننان كەيىن باق-قا سۇحبات بەرگەن پارلامەنت سەناتىنىڭ توراعاسى ماۋلەن اشىمباەۆ ايتتى, دەپ حابارلايدى Egemen.kz.
«1995 جىلى وتكەن رەفەرەندۋمعا قاتىستىم. ال بۇل جولعى رەفەرەندۋمنىڭ ءجونى بولەك. اتالعان ساياسي شارا اشىق ءارى دەموكراتيالى تۇردە ءوتىپ جاتىر. حالىقتىڭ ءوز ويىن ايتۋ مۇمكىندىگى بار. سىناۋ مۇمكىندىگى دە بار. رەفەرەندۋمعا ازاماتتاردى ماجبۇرلەپ قاتىستىرۋ دەگەن ساياسات جوق. قازاقستاندىقتار تاڭداۋدى وزدەرى جاسايدى», دەدى ماۋلەن اشىمباەۆ.
سەنات توراعاسىنىڭ ايتۋىنشا, حالىق ەل ومىرىنە قاتىستى ساياسي رەفورمالارعا بەلسەنە قاتىسۋى ءتيىس.
«رەفەرەندۋمعا وتباسىممەن كەلدىم. جۇبايىم جانە قىزىم بار. قىزىم 18-گە تولىپ العاش رەت داۋىس بەرىپ جاتىر. سەنات مۇشەلەرى رەفەرەندۋم وتەدى دەگەن ساتتەن باستاپ جۇمىسقا قىزۋ كىرىستى. ارىپتەستەرىم وڭىرلەردى ارالاپ, حالىق اراسىندا ءتۇسىندىرۋ جۇمىستارىن جۇرگىزدى», دەيدى ول.
ايتا كەتەيىك, ماۋلەن اشىمباەۆ رەفەرەندۋمعا ساعات 9:00-دە كەلىپ, №111 ۋچاسكەدە داۋىس بەردى.