قازاقستاندىق بوكسشى ءابىلحان امانقۇل كاسىپقوي بوكستاعى ءبىرىنشى جەكپە-جەگىن ءساتتى وتكىزدى, دەپ حابارلايدى Egemen.kz.
ءابىلحان امانقۇل كاسىپقوي رينگكە العاشقى قادامىن اقش-تىڭ ميننەاپوليس قالاسىنداعى بوكس كەشىندە باستادى. ول امەريكالىق دەۆونتە ماكدونالدپەن (1-0, 1 كو) قولعاپ ءتۇيىستىردى.
ورتا سالماقتاعى بوكسشىلار جەكپە-جەگى ءتورت راۋندقا جوسپارلانعان ەدى. ءابىلحان قارسىلاسىن ەكىنشى راۋندتا تەحنيكالىق نوكاۋتقا جىبەرىپ, كەزدەسۋ مەرزىمىنەن بۇرىن اياقتالدى.
وسىلايشا ول كاسىپقوي بوكسقا قادامىن جەڭىسپەن باستادى.
ءابىلحان امانقۇل 1997 جىلى دۇنيەگە كەلگەن. اۋەسقوي بوكستا 2017 جىلى الەم چەمپيوناتىنىڭ كۇمىس جۇلدەگەرى, ازيانىڭ قولا جۇلدەگەرى اتاندى.
ايانا توعانبەك