بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ءىسى بويىنشا اعىلشىن تىلىنەن ورىسشاعا اۋدارما جاسايتىن مامان سوت وتىرىسىنا قاتىسۋدان باس تارتتى, دەپ حابارلايدى Egemen.kz.
بۇل وسىمەن اتالعان ءىس بويىنشا سوت ۇسىنعان ەكىنشى اۋدارماشى. ەكس-مينيستر ە.ءبىرتانوۆ پەن بۇرىنعى ۆيتسە-مينيستر ولجاس ابىشەۆتىڭ ادۆوكاتتارى اۋدارماشىنىڭ ەڭبەك ءوتىلى, قۇجات اۋدارماسىنداعى تاجىريبەسى, قۇقىق قورعاۋ ورگاندارىنداعى تۋىستارىنا قاتىستى, ءبىلىمى مەن بىلىكتىلىگى جانە باسقا دا مۇمكىندىكتەرى تۋرالى سۇراقتار جاۋداردى.
«قورعاۋشىلار تاراپىنان مۇنداي كوزقاراستان سوڭ, سوت پروتسەسىنە قاتىسۋدان ءوزىم باس تارتامىن. ناقتى بىرەۋگە قاتىستى نارازىلىعىم جوق. الايدا بۇل ءىس بويىنشا وتىرىستارعا قاتىسۋدان باس تارتامىن», دەدى اۋدارماشى.
وسى ورايدا ول مۇنداي قادامعا ءوز دەنساۋلىعىن ويلاپ بارىپ وتىرعانىن ايتتى. سۋديا يبراگيم الكەنوۆ اۋدارماشىنى تاڭداۋعا قاتىستى ماسەلە 9 ماۋسىمدا قارالاتىنىن اتاپ ءوتتى. بىراق اۋدارماشىنىڭ قۇزىرەتى تۋرالى ماسەلە قارالمايدى. اۋدارماشى ىرىكتەلگەننەن كەيىن, سوت پروتسەسى بىردەن باستالادى.
ءوز كەزەگىندە ەلجان ءبىرتانوۆ قۇجاتتاردى تولىققاندى اۋدارۋعا ۋاقىت كەرەك ەكەنىن العا تارتىپ, قىلمىستىق ءىستىڭ ماتەريالدارىمەن بارلىعى تانىسۋى ءۇشىن مۇمكىندىك بەرۋدى سۇرادى. ونىڭ ايتۋىنشا, قۇجاتتار اراسىندا حورۆاتيالىق Ericsson Nicola Tesla كومپانياسى تاراپىنان ورىندالعان جۇمىستاردى راستايتىن مالىمەتتەر بار.
ە. ءبىرتانوۆتىڭ پايىمىنشا, وسى قۇجاتتارمەن تانىسقاننان كەيىن قىلمىس قۇرامىنىڭ بولماۋىنا بايلانىستى, پروكۋرورلاردىڭ وزدەرى ءىستى توقتاتۋ تۋرالى مالىمدەمە جاساۋى مۇمكىن.
بۇدان بۇرىن حابارلانعانداي, دەنساۋلىق ساقتاۋ مينيسترلىگىنىڭ بۇرىنعى باسشىسى ەلجان ءبىرتانوۆتىڭ ادۆوكاتى نۇرلان بەيسەكەەۆ سوت وتىرىسىندا نۇر-سۇلتان قالاسىنىڭ №2 سارىارقا اۋداندىق سوتىنىڭ سۋدياسى يبراگيم الكەنوۆكە قارسى شاعىم ءبىلدىردى. بيىل مامىر ايىندا سۋديا يبراگيم الكەنوۆ ەلجان ءبىرتانوۆتىڭ ادۆوكاتتارى نەگىزگى سوت وتىرىسىنا تارتىلعان مەملەكەتتىك ايىپتاۋشىلار مەن دەنساۋلىق ساقتاۋ مينيسترلىگى وكىلىنە بىلدىرگەن قارسىلىقتى قابىلداماي تاستاعان ەدى.
بۇرىنعى دەنساۋلىق ساقتاۋ ءمينيسترى ەلجان ءبىرتانوۆ 2020 جىلدىڭ 3 قاراشاسىندا بيۋدجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن. تەرگەۋ ماتەريالى بويىنشا, ەلجان ءبىرتانوۆ پەن ونىڭ كومەكشىسى بولعان ولجاس ابىشەۆكە «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ملرد تەڭگەنىڭ شىعىنى كەلتىرگەنى تۋرالى ايىپ تاعىلىپ وتىر.
ال بيىل 12 مامىردا سوت ەلجان بىرتانوۆقا قاتىستى قىلمىستىق ءىستى توقتاتۋدان باس تارتقان ەدى.