قوستانايعا وڭتۇستىك كورەيانىڭ قازاقستانداعى توتەنشە جانە وكىلەتتى ەلشىسى كۋ حونگ سوك جۇمىس ساپارىمەن كەلدى. ەلشى الدىمەن «سارىارقااۆتوپروم» اۆتوزاۋىتىنا بارىپ, الەمگە تانىمال كورەي برەندى Kia اۆتوكولىگى قۇراستىرىلىپ جاتقان ءوندىرىس الاڭىنىڭ جۇمىسىمەن تانىستى.
زاۋىت بىلتىر جاڭا ۇلگىدەگى Kia Sportage اۆتوكولىگىن شىعاراتىن ۇساق توراپتى قۇراستىرۋ جەلىسىن ىسكە قوسقان. جاڭا ۇلگىدەگى كورەي كروسسوۆەرىنىڭ شاناعى دا وسى جەلىدە دانەكەرلەنەدى. شاناقتى بوياۋ جۇمىستارى دا وسىندا اتقارىلادى.
كۋ حونگ سوك مىرزانىڭ ايتۋىنشا, الداعى ۋاقىتتا قوستانايدا قۇراستىرىلىپ جاتقان Kia اۆتوكولىكتەرىنىڭ جەرگىلىكتى ۇلەسىن ارتتىرۋ ارقىلى قازاقستان مەن كورەيانىڭ كولىك ونەركاسىبى سالاسىنداعى ىنتىماقتاستىعىن نىعايتا ءتۇسۋ كوزدەلىپ وتىر.
«قوستاناي زاۋىتىنداعى جاڭا ۇلگىدەگى ۇساق توراپتى ءوندىرىس قازاقستاننىڭ اۆتوونەركاسىبىن دامىتۋدىڭ جاڭا ۆەكتورى بولا الادى جانە جەرگىلىكتى اۆتوزاۋىتتى ىلگەرىلەتەتىن ءتيىمدى تاجىريبە بولىپ تابىلادى», دەدى ەلشى.
«سارىارقااۆتوپروم» 12 جىلدا 200 مىڭعا جۋىق كولىك قۇراستىردى. بۇگىندە قوستانايلىق تەمىر تۇلپارلاردىڭ ءبىرازى ىشكى نارىقتاعى سۇرانىستى وتەپ جاتسا, ءبىرازى سىرتقى ساۋداعا شىعارىلادى.
ەلشى كۋ حونگ سوك ودان كەيىن ايماق باسشىسى ارحيمەد مۇحامبەتوۆپەن كەزدەستى. جىلى جۇزدەسۋ بارىسىندا وبلىس وندىرەتىن اۋىلشارۋاشىلىق تاۋارلارىن ەكسپورتتاۋ ماسەلەسى ءسوز بولدى. وبلىس اكىمىنىڭ ايتۋىنا قاراعاندا, 2021 جىلى قوستاناي وبلىسى مەن وڭتۇستىك كورەيا رەسپۋبليكاسىنىڭ اراسىنداعى تاۋار اينالىمى شامامەن 73 ملن دوللاردى قۇرادى. قوستاناي اۆتووندىرىسكە قاجەتتى بولشەكتەردى, ەلەكتر اككۋمۋلياتورلارىن, مەتيز ونىمدەرى مەن ەلەكتر جابدىقتارىن كورەي ەلىنەن ساتىپ الادى. ەندىگى ماقسات – ەكسپورت ماسەلەسىن شەشۋ.
– ءبىز ەكىجاقتى ساۋدا كولەمىن ۇلعايتۋدى, سونىڭ ىشىندە وڭتۇستىك كورەياعا ءونىم ەكسپورتتاۋ ماسەلەسىن قاراستىراتىن بولامىز. بۇعان وبلىستىڭ الەۋەتى مەن وندىرىستىك قۋاتىنىڭ مۇمكىندىگى تولىق جەتەدى. وعان قوسا ينۆەستيتسيالىق پرەفەرەنتسيالار مەن جەڭىلدىكتەر ارقىلى قارجىلاندىرىلاتىن مەملەكەتتىك باعدارلامالار بار. بىزگە كەلىپ ءوندىرىس باستاعىسى كەلەتىن كورەي ينۆەستورلارىنىڭ دا ۇسىنىستارىن قاراۋعا ءازىرمىز, – دەدى ا.مۇحامبەتوۆ.
قوستاناي