پرەزيدەنت جانىنداعى مەملەكەتتىك باسقارۋ اكادەمياسىنىڭ بازاسىندا «جاستار جانە رەفەرەندۋم» وقىتۋ سەمينارى ءوتتى. جيىن بارىسىندا كونستيتۋتسياعا ەنگىزىلەتىن وزگەرىستەر مەن تولىقتىرۋلاردى قابىلداۋ ماسەلەسى تالقىلاندى.
سەميناردىڭ ماقساتى – بۇكىلحالىقتىق رەفەرەندۋمدى دايىنداۋ تۋرالى جاس ازاماتتار اراسىندا ءتۇسىندىرۋ جۇمىستارىن جۇرگىزۋ. ءىس-شارادا ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ رەسپۋبليكالىق رەفەرەندۋمدى ۇيىمداستىرۋ ماسەلەلەرىنە توقتالدى. ونىڭ ايتۋىنشا, ەلىمىزدىڭ ءار تۇكپىرىندە ءتۇرلى وقىتۋ سەمينارلارى وتكىزىلىپ جاتىر.
«مەملەكەتىمىزدىڭ جاڭا باعىتقا بەت الۋى – ومىردە ىزدەنىستە جۇرگەن جاستار ءۇشىن اسا قاجەت. سوندىقتان وسىنداي سەميناردىڭ وتۋىنە شىن كوڭىلدەن قۋانىپ وتىرمىن», دەدى ن.ءابدىروۆ.
سونداي-اق سپيكەر ورتالىق رەفەرەندۋم كوميسسياسىنىڭ ايماقتارعا ساپارى جۇمىسىنا توقتالدى. ونىڭ ايتۋىنشا, پرەزيدەنتتىڭ باستاماسىمەن قولعا الىنعان جوبا – اۋىل اكىمدەرىن سايلاۋ جۇرتشىلىق اراسىندا قىزۋ قولداۋعا يە بولىپ وتىر.
«ايماقتارعا ساپار بارىسىندا 443 ناقتى ۇسىنىس جينالدى. كەزدەسۋلەر بەيرەسمي فورماتتا ءوتتى. بۇكىل قازاقستاندى ارالاپ شىقتىق, ون مىڭعا جۋىق اداممەن كەزدەستىك. وندا ايتىلعان ۇسىنىستاردى ەسكەرەمىز, قازىر ولاردى ساراپتاپ جاتىرمىز», دەدى ن.ءابدىروۆ.
ادىلەت ءمينيسترىنىڭ ورىنباسارى الما مۇقانوۆا كونستيتۋتسياعا ەنگىزىلەتىن نەگىزگى وزگەرىستەر جايلى ءتۇسىندىردى. ۆيتسە-مينيستر رەفەرەندۋمدا ءبىر عانا ماسەلە – اتا زاڭعا ەنگىزىلەتىن وزگەرىستەردى قابىلداۋ جونىندە ساۋال قويىلاتىنىن جەتكىزدى.
«ەگەر 11 وبلىستاعى حالىقتىڭ كوپشىلىگى جاقتاپ داۋىس بەرسە, وندا تۇزەتۋلەر قابىلداندى دەپ ەسەپتەلىنەدى. ەگەر بۇل كورسەتكىشكە قول جەتكىزىلمەسە, وندا تۇزەتۋلەر قابىلدانباعان بولىپ سانالادى», دەدى ا.مۇقانوۆا.
جاستار وكىلدەرى وزدەرىن تولعاندىرعان سۇراقتارىن قويىپ, وعان تۇششىمدى جاۋاپ بەرىلدى. ءىس-شاراعا رەسپۋبليكالىق جانە وڭىرلىك جاستار ۇيىمدارىنىڭ باسشىلارى مەن بەلسەندىلەرى, وڭىرلىك جاستار رەسۋرستىق ورتالىقتارىنىڭ, وقۋ ورىندارىنىڭ جاستار ءىسى جونىندەگى كوميتەتتەرىنىڭ قىزمەتكەرلەرى, نۇر-سۇلتان قالاسىنىڭ جوعارى وقۋ ورىندارىنىڭ ستۋدەنتتەرى, ماگيسترانتتارى مەن دوكتورانتتارى قاتىستى.
سەميناردى ورتالىق رەفەرەندۋم كوميسسياسى جانە پرەزيدەنت جانىنداعى مەملەكەتتىك باسقارۋ اكادەمياسىنىڭ ەلەكتورالدىق وقىتۋ ورتالىعى ۇيىمداستىردى. ءىس-شاراعا ءار ايماقتاعى جاستار مەن جاستار ۇيىمدارىنىڭ وكىلدەرى بەينە بايلانىس رەجىمىندە قاتىستى.