بيىلدان باستاپ الەۋمەتتىك وسال وتباسى بالالارى 15%-دىق كۆوتامەن مامانداندىرىلعان مەكتەپتەرگە تۇسە الادى. وسىنداي وتباسىنان شىققان وقۋشىلار مەكتەپتە بىرقاتار پاننەن اپتاسىنا كەمىندە تەگىن 3 قوسىمشا ساباق الا الادى. ال كوللەدجدەردە تەگىن ءبىلىم الۋعا 45 مىڭ گرانت بولىنبەك.
الەۋمەتتىك وسال وتباسىنان شىققان بالالاردى قولداۋدىڭ جاڭا تەتىكتەرى تۋرالى ءبىلىم جانە عىلىم ءمينيسترى اسحات ايماعامبەتوۆ ءوزىنىڭ facebook الەۋمەتتىك جەلىسىندەگى رەسمي پاراقشاسىندا جازدى.
«كوپتەگەن زەرتتەۋ دارىندى وقۋشىلاردى عانا ەمەس, سونىمەن قاتار الەۋمەتتىك وسال توپتاعى بالالاردى دا قولداۋدىڭ ماڭىزدىلىعىن كورسەتەدى. جوعارى وقۋ ورىندارىنا ىرىكتەۋ جۇيەسى, ۋنيۆەرسيتەت گرانتتارىن ءبولۋ, دارىندى بالالارعا ارنالعان ارنايى مەكتەپتەر, ءتۇرلى وليمپيادالار, بايقاۋلار وتكىزۋدە, پەداگوگتەردى باعالاۋ كەزىندە دە ۇلگەرىمى ناشار وقۋشىلارمەن جۇمىس ىستەگەنىنە ەمەس, ءداستۇرلى تۇردە جەتىستىككە جەتكەن وقۋشىلارىنىڭ ناتيجەسىنە نازار كوبىرەك اۋدارىلادى. ارينە, مۇنى ەمتيحان تاپسىرىپ, ەڭ جوعارى بالل العاندىقتان ءادىل دەۋگە بولادى. بىراق اتا-انالار دارىندى بالالارعا ارنالعان مەكتەپتەرگە ءتۇسۋ ءۇشىن رەپەتيتور كومەگىنە جۇگىنىپ جاتاتىنى دا بەلگىلى. ادەتتە الەۋمەتتىك-ەكونوميكالىق جاعدايى تومەن وتباسىلاردىڭ مۇمكىندىكتەرى بىردەي ەمەس. بۇل مەريتوكراتيانىڭ (الەۋمەتتىك-ەكونوميكالىق جاعدايىنا قاراماستان قابىلەتتى ادامنىڭ جەتەكشىلىك ەتۋىن تالاپ ەتەتىن باسقارۋ قاعيداسى) «قاراڭعى» تۇسى», دەيدى ا.ايماعامبەتوۆ.
ءمينيستردىڭ ويىنشا, ىرىكتەۋ بارلىعىنا تەڭ جانە ءادىل بولۋى كەرەك, بىراق ىرىكتەۋ جۇيەسى ءالى دە تولىقتىرۋدى قاجەت ەتەدى. سونداي-اق بۇل جەردە مەريتوكراتيا مەن ينكليۋزيۆتىلىكتىڭ تەپە-تەڭدىگىن ساقتاۋ ماڭىزدى. وسىعان بايلانىستى مەكتەپتەردە, كوللەدجدەر مەن ۋنيۆەرسيتەتتەردە وسى ماسەلەنى تەڭەستىرۋ ءۇشىن وزگەرىستەر جۇزەگە اسىرىلماق.
«بيىل ءبىز الەۋمەتتىك وسال وتباسى بالالارى ءۇشىن مامانداندىرىلعان مەكتەپتەرگە تۇسۋگە جاڭا 15%-دىق كۆوتا ەنگىزۋ تۋرالى شەشىم قابىلدادىق. ياعني ەندى وسىنداي وتباسىنان شىققان 2 مىڭنان اسا بالا جاڭا كۆوتا بويىنشا بيل, دارىن جانە ت.ب مەكتەپتەرگە وقۋعا تۇسە الادى. 15% دەگەن كوپ ەمەس. سول سەبەپتى مامانداندىرىلعان وقۋ ورىندارى باسشىلارىنا مەكتەپتەردىڭ ناتيجەلەرىنە اسەر ەتەدى دەپ الاڭداۋعا نەگىز جوق. وسىعان قوسا «ساندىق (تسيفرلى) رەپەتيتور» جوباسىن ەنگىزىپ جاتىرمىز. جاڭاشىلدىقتىڭ ماقساتى – الەۋمەتتىك وسال وتباسىنان شىققان بالالارعا (500 مىڭعا جۋىق وقۋشى) اپتا سايىن تەگىن ماتەماتيكا, ءتىل نەمەسە جاراتىلىستانۋ پاندەرىنەن كەمىندە 3 قوسىمشا ساباق الۋ مۇمكىندىگىن بەرۋ. ءبىز «قازاقستان حالقى» قورىنان وسى جوبانى قارجىلاندىرۋعا قولداۋ كورسەتۋدى سۇرادىق», دەيدى ۆەدومستۆو باسشىسى.
ا.ايماعامبەتوۆتىڭ ايتۋىنشا, بيىل رەسپۋبليكالىق بيۋدجەتتەن قوسىمشا 45 مىڭ گرانت ءبولىندى. بۇل بىلىممەن قامتۋدى ارتتىرۋ ماقساتىندا اكىمدىكتەر مەن جەرگىلىكتى كوللەدجدەرگە بەرىلەدى. اكىمدىكتەردىڭ قارجىلاندىرۋى جەتكىلىكسىز بولعاندىقتان, كوبى كوللەدجدە وقۋعا تەگىن گرانت الا الماعان. وسىلايشا, كوللەدجدەرگە بولىنگەن جالپى گرانت 125 مىڭعا كوبەيدى.
«بىلتىر گرانتتاردى ءبولۋ كەزىندە ءبىز العاش رەت الەۋمەتتىك وسال وتباسىنان شىققان بالالارعا ۋنيۆەرسيتەتتە وقۋعا كۆوتا ەنگىزدىك. وسىنىڭ ناتيجەسىندە وتكەن جىلى مۇمكىندىگى از بولعاندارعا ەندى مەملەكەت ەسەبىنەن ءبىلىم الۋ مۇمكىندىگى ايتارلىقتاي ارتتى. وسى ستۋدەنتتەردىڭ ءبىرىنشى وقۋ جىلىنىڭ ناتيجەسىن جانە وسىنداي شەشىمنىڭ تيىمدىلىگىن كورىپ, بولاشاقتا بۇل كۆوتانى ودان ءارى ۇلعايتىپ, جالپى گرانت سانىنىڭ 15%-ىنا جەتكىزۋدى ءجون كوردىك. ياعني حالىقتىڭ الەۋمەتتىك وسال توپتارىنان شىققان تاعى 5 مىڭ بالا مەملەكەتتىك بيۋدجەتتە وقۋعا مۇمكىندىك الادى. سونىمەن قاتار وسى جىلى اۋىل مەكتەپتەرى تۇلەكتەرىنىڭ جوعارى ءبىلىم الۋعا قولجەتىمدىلىگىن قامتاماسىز ەتۋ ماقساتىندا ولاردىڭ كۆوتاسىن 35 پايىزعا دەيىن ۇلعايتىپ جاتىرمىز», دەدى مينيستر.