باتىس قازاقستان وبلىسىندا شالعايدا ورنالاسقان بوكەي ورداسى جانە جانىبەك اۋداندارىندا جاڭارتىلاتىن ەنەرگيا كوزدەرى قوندىرعىسىن ورناتۋ كوزدەلۋدە, دەپ حابارلايدى Egemen.kz.
بقو ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى ميرجان نۇرتازيەۆتىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگىدە ءمالىم ەتكەنىندەي, اتالعان اۋداندار ەلەكتر قۋاتىن رەسەيلىك كوزدەردەن الادى. ونىڭ سوزىنە قاراعاندا, قولدانىستاعى جەلىلەر ارقىلى بوكەي ورداسى مەن جانىبەككە ءوز ەلەكتر ەنەرگيامىزدى جەتكىزۋگە مۇمكىندىك جوق. جوبا جۇزەگە اسقان جاعدايدا بۇل وبلىستى ەلەكتر قۋاتى يمپورتىنان قۇتىلا تۇسۋگە مۇمكىندىك بەرەدى.
سونىمەن قاتار جاڭارتىلاتىن ەنەرگيا كوزدەرىن ەنگىزۋ بويىنشا «Green Service Company» جشس كومپانياسى قۋاتى 2,5 مۆت ەلەكتر ەنەرگياسىن وندىرەتىن قاتتى تۇرمىستىق قالدىقتاردى ەنەرگەتيكالىق كادەگە جاراتۋ نىسانى قۇرىلىسىن باستاۋدى جوسپارلاپ وتىر. بۇل جوبا ءوندىرىس جانە تۇتىنۋ قالدىقتارىن پوليگوندارعا اكەتپەي-اق ورال قالاسى اۋماعىن سانيتارلىق تازارتۋعا جول اشادى.
«قوسىمشا ەلەكتر ستانتسيالارىن سالۋ ناتيجەسىندە رەسەيدەن جەتكىزىلەتىن قۋات كولەمى قىسقاردى. كۇنى بۇگىن 14 ملن كۆت ساعات ەلەكتر قۋاتى كورشى ەلدەن جەتكىزەدى. بۇل – كوپ ەمەس, بارلىق تۇتىنىلاتىن ەلەكتر قۋاتى كولەمىنىڭ 11 پايىزى. الداعى ۋاقىتتا دا ەنەرگيانى ۇنەمدەۋ جانە تيىمدىلىگىن ارتتىرۋ, سونداي-اق بالامالى قۋات كوزدەرىن ىسكە قوسۋ باعىتىنداعى جۇمىستار جالعاسادى», دەدى م.نۇرتازيەۆ.
ەسكە سالا كەتەيىك, بۇدان بۇرىن باتىس قازاقستاندا ەلەكتر قۋاتىن ءوندىرۋ 4,1 پايىزعا وسكەنىن جازعان بولاتىنبىز.
گۇلدانا ەلۋباي