كىمدەردىڭ سوققىسى جويقىن؟

كاسىپقوي بوكستا ەرلەر اراسىندا بارلىعى 17 سالماق دارەجەسى بار. ياعني توپ-10-دىقتىڭ ساناتىنا 170 بوكسشى ەنىپ وتىر. قازىرگى كەزدە امەريكالىقتاردىڭ قارقىنى وتە كۇشتى. ۇزدىكتەر تىزىمىنەن اقش-تىڭ 42 وكىلىنىڭ ەسىمىن كەزىك­تىرۋگە بولادى. ەكىنشى ورىندا – ۇلىبريتانيا. تۇماندى البيون ەلىنىڭ 24 بوكس­شىسى مىقتىلار قاتارىندا. ءۇشىنشى جانە ءتورتىن­شى ساتىلارعا جايعاسقان مەكسيكا مەن جاپونيانىڭ دا جاعدايى وتە جاقسى. اتستەكتەردىڭ 18 جانە كۇن­شىعىس ەلىنىڭ 12 بىلعارى قولعاپ شەبەرى وسى رەيتينككە ەنگەن. سەگىز وكىلىنە سەنىم ارتقان ءفيليپپيننىڭ دە قارقىنى جامان ەمەس.

سولارمەن قاتار توپ-10 بوكس­شىنىڭ ساناتىندا رەسەي مەن كۋبا­نىڭ – التى, پۋەرتو-ريكونىڭ – بەس, اۋستراليا, دومينيكا رەسپۋب­ليكاسى مەن ۋكراينانىڭ – ءتورت, تاي­لاندتىڭ – ءۇش, ارگەنتينا, نيكا­راگۋا, يسپانيا, ۆەنەسۋەلا, برا­زي­ليا, وار, قازاقستان, وزبەك­ستان, كانادا جانە كونگونىڭ – ەكى, جاڭا زەلانديا, تاجىكستان, پاكىس­تان, پاناما, يندونەزيا, ەكۆادور, فران­تسيا, گانا, پولشا, گەرمانيا, بەل­گيا, ابحازيا, ارمەنيا جانە رۋمى­نيانىڭ ءبىر-بىردەن سپورتشىلارى بار.

بۇگىنگى تاڭدا الەمدىك رەيتينگتە كوش باستاۋ قۇرمەتىنە نەبارى 10 مەملەكەتتىڭ گۇرزى جۇدىرىقتى جىگىتتەرى عانا بولەنىپ وتىر. بۇل تارتىستا دا اقش-تىڭ الدىنا ەشكىم تۇسە المايدى. «بوكستىڭ مەككەسى» سانالاتىن امەريكانىڭ بەس بەتكەۇستارى قارسى كەلگەندەردى قوعاداي جاپىرىپ كەلەدى. جەر-جاھاننىڭ تەڭدەسسىزى دەپ تانىلعان جاپونيادان ءۇش ساڭلاق شىقتى. ۇلىبريتانيانىڭ ەكى مارقاسقاسى ءدال سونداي قۇرمەتكە بولەنۋدە. سونداي-اق كوشباسشىلار قاتا­رىندا ۋكراينا, لاتۆيا, قازاقستان, رەسەي, اۋستراليا, مەكسيكا جانە تايلاندتىڭ ءبىر-بىردەن وكىلدەرى بار. مىنە, قازىرگى كەزدە الەمدىك كاسىپقوي بوكستا ۇستەمدىك قۇرىپ جۇرگەن وسى مەملەكەتتەردىڭ ءور مىنەزدى جىگىتتەرى.

الەمدىك رەيتينگتەردە كوش باستاپ تۇرعان ەڭ ۇزدىك ءۇش بوكسشى

+90,7 كيلو: 1. الەكساندر ۋسيك (ۋكراينا), 2. تايسون فيۋري ( ۇلىبريتانيا), 3. ەنتوني دجوشۋا ( ۇلىبريتانيا). 

– 90,7 كيلو: 1. مايريس بريەديس (لات­ۆيا), 2. لوۋرەنس وكولي ( ۇلى­بري­تانيا), 3. يلۋنگا ماكابۋ (كونگو).

79,4 كيلو: 1. دميتري بيۆول (رەسەي), 2. ارتۋر بەتەربيەۆ (رەسەي), 3. دجو سميت (اقش). 

76,2 كيلو: 1. داۆيد بەناۆيدەس (اقش), 2. كەيلەب پلەنت (اقش), 3. دجون رايدەر ( ۇلىبريتانيا).  

72,6 كيلو: 1. گەننادي گولوۆكين (قازاقستان), 2. دجەرمالل چارلو (اقش), 3. دەمەتريۋس اندرادە (اقش). 

69,9 كيلو: 1. دجەرمالل چارلو (اقش), 2. سەباستيان فۋندورا (اقش), 3. برايان كاستانو (ارگەن­تينا). 

66,7 كيلو: 1. ەررول سپەنس (اقش), 2. تەرەنس كروۋفورد (اقش), 3. يوردەنيس ۋگاس (كۋبا). 

63,5 كيلو: 1. دجوش تەيلور ( ۇلىبريتانيا), 2. حوسە راميرەس (اقش), 3. حوسە سەپەدا (اقش). 

61,2 كيلو: 1. دجوردج كامبوسوس (اۋستراليا), 2. دەۆين حەيني (اقش), 3. تەوفيمو لوپەس (اقش).

59 كيلو: 1. شاكۋر ستيۆەنسون (اقش), 2. كەنيچي وگاۆا (جاپو­نيا), 3. وسكار ۆالدەس (مەكسيكا).

57,2 كيلو: 1. ەمانۋەل ناۆار­رەتە (مەكسيكا), 2. لي ۆۋد ( ۇلى­بري­تانيا), 3. مارك ماگسايو (فيليپپين).

55,3 كيلو: 1. ستۆەن فۋلتون (اقش), 2. مۋرودجون احماداليەۆ (وزبەكستان), 3. برەندون فيگەروا (اقش).

53,5 كيلو: 1. ناويا ينوۋە (جاپو­نيا), 2. نونيتو دونەير (فيليپ­پين), 3. پول باتلەر ( ۇلى­بريتانيا).   

52,2 كيلو: 1. كادزۋتو يوكا (جاپونيا), 2. دجەسسي رودريگەس (اقش), 3. فەرناندو مارتينەس (ارگەنتينا).

50,8 كيلو: 1. سانني ەدۆاردس ( ۇلىبريتانيا), 2. دزۋنتو ناكا­تاني (جاپونيا), 3. ارتەم دالاكيان (ۋكراينا). 

49 كيلو: 1. كەن شيرو (جاپو­نيا), 2. دجوناتان گونسالەس (في­ليپ­پين), 3. ەلۆين سوتو (مەكسيكا). 

47,6 كيلو: 1. پانيا پرادابسري (تايلاند), 2. تاممانۋن نومترونگ (تايلاند), 3. ماساتاكا تانيگۋچي (جاپونيا).

ارينە, قازاقستان سەكىلدى بوكس ونەرى ايتارلىقتاي جاقسى دامىعان قابىرعالى مەملەكەت ءۇشىن بەدەلى زور vRINGe.com ينتەرنەت-جۋرنالىنىڭ رەيتينگىندە نەبارى ەكى-اق وكىلىنىڭ بولۋى ازدىق ەتەتىنى ءسوزسىز. سول سەبەپتى دە الداعى ۋاقىت­تا گەننادي گولوۆكين مەن جانىبەك ءالىمحان ۇلىنان بولەك, تاعى بىرنەشە وتانداسىمىز وزىق وندىقتىڭ قاتارىنا قوسىلۋعا ءتيىس. ءدال قازىرگى كەزدە كىمدەرگە سەنىم ارتۋعا بولادى؟ وسى ساۋالعا تۇششىمدى جاۋاپ الۋ ءۇشىن كاسىپقوي بوكستاعى ەڭ بەلدى ءتورت نۇسقانىڭ رەيتينگىنە كوز جۇگىرتكەن ءجون.

قازاقستاننىڭ ەڭ ۇزدىك بوكس­شىسى گەننادي گولوۆكين ەكەنى ءسوزسىز. قاراعاندى بوكس مەكتەبىنىڭ تۇلەگى ورتا سالماقتا (72,2 كيلو) WBA-نىڭ سۋپەر چەمپيوندىق جانە IBF-ءتىڭ چەمپيوندىق بەل­بەۋىن يەلەنۋدە. ءدال وسى سالماقتا WBO-نىڭ رەيتينگىندە ەكىنشى ورىن­دى ەنشىلەگەن جانىبەك ءالىم­حان ۇلىنىڭ «ۋاقىتشا» الەم چەمپيونى اتاعى بار. WBA تىزىمىندە ول جەتىنشى ورىندا تۇر. ايدوس ەربو­سىن ۇلى مەن قامشىبەك قوڭقا­باەۆتىڭ دا قازىرگى قارقىنى قۋان­تادى. ەكەۋى دە ەڭ بەلدى نۇسقا­لاردىڭ رەيتينگىندە ءتورتىنشى ورىنعا تابان تىرەۋدە. ايدوس IBF-تا, قامشىبەك WBA-دا.

سونداي-اق ءوز سالماق دارەجە­لەرى بويىنشا مىنا جۋان جۇدى­رىقتى جىگىتتەرىمىز توپ-10-دىققا ەنىپ وتىر: ءالي احمەدوۆ (76,2 كيلو, IBF) – 5 ورىن, جانىبەك ءالىمحان ۇلى (72,6 كيلو, WBA ) – 7 ورىن, سۇلتان زاۋىربەك (59 كيلو, WBA) – 7 ورىن, جان كوسوبۋتسكي (+90,7 كيلو, WBA) – 8 ورىن), ايدوس ەربوسىن ۇلى (76, 2 كيلو, WBO) – 8 ورىن, ەۆگەني پاۆلوۆ (55,3 كيلو, WBA) – 9 ورىن جانە مەيىرىم نۇرسۇلتانوۆ (72,6 كيلو, WBC) – 10 ورىن. ازىرگە كاسىپقوي رينگتە جۇدىرىقتاسىپ جۇرگەن قازاقستاندىق بىلعارى قولعاپ شەبەرلەرى اراسىنداعى ەڭ ۇزدىكتەرى وسىلار.