11 ماۋسىمدا اقتاۋدا Adal Promotions پروموۋتەرلىك كومپانياسىنىڭ ۇيىمداستىرۋىمەن كاسىپقوي بوكس كەشى وتەتىنى بەلگىلى. سول جارىستىڭ باستى جەكپە-جەگىندە ورتا اۋىر سالماقتا كۇش سىناسىپ جۇرگەن قازاقتىڭ قايسار ۇلى بەكزات نۇرداۋلەتوۆ ارگەنتينالىق دۋرۆال پالاسيومەن شارشى الاڭعا شىعادى.
بەكزاتتىڭ اۋەسقويلار رينگىندە ەلەۋلى تابىستارعا قول جەتكىزگەنى بارشاعا ءمالىم. مارات جاقيەۆتاي بىلىكتى ماماننان ءتالىم-تاربيە العان 24 جاستاعى ماڭعىستاۋ وبلىسىنداعى جاڭاوزەن قالاسىنىڭ تۋماسى 2006 جىلى جاستار اراسىنداعى الەم بىرىنشىلىگىندە قولا مەدالدى يەلەگەننەن كەيىن كوپشىلىك نازارىنا ىلىكتى. 2009 جىلى رەسەيدىڭ ەكاتەرينبۋرگ قالاسىندا جالاۋى جەلبىرەگەن الەم چەمپيوناتىندا قانداسىمىز جاسىنداي جارقىلداپ, باس جۇلدەنى قانجىعاسىنا بايلادى. اسىرەسە ول حۋليو دە لا كرۋستى ۇتقاندا شاتتانباعان قازاق قالمادى-اۋ! ءتىپتى نۇرداۋلەتوۆ ريو وليمپياداسىنىڭ جەڭىمپازى, الەمنىڭ ءتورت دۇركىن چەمپيونى, پانامەريكا ويىندارىنىڭ ءۇش دۇركىن جەڭىمپازى دەگەن اتاعى بار داڭقتى كۋبالىق بوكسشىنى ەسەڭگىرەتىپ تە تاستادى.
بەكزات 2021 جىلى توكيو وليمپياداسىنا قاتىستى. وكىنىشكە قاراي, جاپون جەرىندە ونىڭ جولى بولمادى. 2020 جىلدىڭ كۇزىندە ول اتىراۋدا كاسىپقويلار اراسىنداعى تۇساۋكەسەر كەزدەسۋىن وتكىزىپ, تانزانيالىق يبراگيم مادجوگىندى ەكىنشى راۋندتا ۇرىپ جىقتى. ودان كەيىن نيگەريالىق كابيرۋ توۆالاۆي مەن وزبەكستاندىق فارۋح جۋراەۆتى ۇپاي سانىمەن ۇتتى. بيىل 5 اقپاندا اقتاۋدا وتكەن تۋرنيردە نيدەرلاندتىق چيسو كۆاسيدى توعىزىنشى راۋندتا ەسىنەن تاندىرعان نۇرداۋلەتوۆ WBO Youth نۇسقاسى بويىنشا الەم چەمپيونى اتاندى.
بەكزاتتىڭ كەلەسى قارسىلاسى دا وسال ەمەس. «بومبالاۋشى» دەگەن لاقاپ اتپەن تانىلعان ارگەنتينالىق دۋرۆال پالاسيو وسى كۇنگە دەيىن 11 كەزدەسۋ وتكىزىپ, سونىڭ توعىزىن ءوز پايداسىنا شەشكەن. التى باسەكەدە ايقىن باسىمدىق تانىتتى.
اقتاۋداعى بوكس كەشىندەگى بەكمان سويلىباەۆ پەن مەيىرىم نۇرسۇلتانوۆتىڭ دا جەكپە-جەكتەرى كوپشىلىكتىڭ قىزىعۋشىلىعىن تۋدىرادى دەگەن ويدامىز. 31 جاستاعى بەكمان (13-1, 5 KO) وزىنەن ون جاس ۇلكەن مەكسيكالىق توماس روحاسپەن ايقاسادى. اتستەكتەر ەلى وكىلىنىڭ ءجۇرىپ وتكەن جولىنا تاڭدانباۋ مۇمكىن ەمەس. كاسىپقوي رينگتەگى ءوزىنىڭ تۇساۋكەسەر كەزدەسۋىن روحاس وسىدان شيرەك عاسىردان اسا ۋاقىت بۇرىن وتكىزگەن ەكەن. سول كەزدەن بەرى رينگكە 74 رەت كوتەرىلدى. 52 مارتە جەڭىسكە جەتىپ, 34 قارسىلاسىن نوكاۋتقا جىبەردى. 19 رەت جەڭىلىپ, ءبىر باسەكەنى تەڭ اياقتادى. ءبىر ايتا كەتەرلىگى, ءدال سول جارىس وتەتىن كۇنى توماس 42 جاسقا تولادى. ال ەشكىمنەن جەڭىلىپ كورمەگەن 28 جاستاعى مەيىرىم نۇرسۇلتانوۆ (16-0, 9 كو) ارگەنتينالىق سەباستيان وراسيو پاپەسكيمەن ايقاسادى. ونىڭ كورسەتكىشى – 21 جەكپە-جەك, 18 جەڭىس (6 نوكاۋت) جانە 3 جەڭىلىس.