پرەزيدەنت كومەكشىسى – قاۋىپسىزدىك كەڭەسىنىڭ حاتشىسى عيزات نۇرداۋلەتوۆ اۋعانستان ماسەلەلەرى جونىندەگى وڭىرلىك قاۋىپسىزدىك ديالوگىنىڭ IV وتىرىسىنا قاتىستى. بۇل جونىندە مەملەكەت باسشىسىنىڭ ءباسپاسوز قىزمەتى حابارلادى.
دۋشانبە قالاسىندا اۋعانستان ماسەلەلەرى بويىنشا وڭىرلىك قاۋىپسىزدىك ديالوگىنىڭ IV وتىرىسى ءوتتى. اتالعان جيىنعا قىتاي, رەسەي فەدەراتسياسى, ءۇندىستان, پاكىستان, يران, وزبەكستان, تاجىكستان, قىرعىزستان جانە تۇرىكمەنستان ەلدەرىنىڭ قاۋىپسىزدىك كەڭەسىنىڭ حاتشىلارى مەن ۇلتتىق قاۋىپسىزدىك جونىندەگى كەڭەسشىلەرى قاتىستى.
قازاقستان دەلەگاتسياسىن پرەزيدەنت كومەكشىسى – قاۋىپسىزدىك كەڭەسىنىڭ حاتشىسى عيزات نۇرداۋلەتوۆ باستاپ باردى. ول ءوز سوزىندە بۇكىل ءوڭىردىڭ مۇددەسى ءۇشىن ەلدەگى جاعدايدى وزگەرتۋدىڭ كىلتى سانالاتىن باعىتتاردى, سونىڭ ىشىندە حالىقارالىق تەرروريزم مەن ەكسترەميزم قاتەرلەرىنىڭ ەكسپورتىنا جول بەرمەۋ, ەسىرتكى بيزنەسىنە قارسى ءىس-قيمىل, ازىق-ت ۇلىك قاۋىپسىزدىگىن قامتاماسىز ەتۋ جانە گۋمانيتارلىق داعدارىستى ەڭسەرۋ جونىندە بايانداپ بەردى.
بۇكىل وڭىردەگى كولىك قاتىناستارىن جانداندىرۋ قاجەتتىگى جانە اۋعانستاندى الەۋمەتتىك-ەكونوميكالىق تۇرعىدان قالپىنا كەلتىرۋ ماقساتىندا ءبىلىم بەرۋ جۇيەسىن دامىتۋ ماسەلەسى ەكونوميكالىق قاۋىپسىزدىكتىڭ نەگىزگى فاكتورى رەتىندە اتاپ ءوتىلدى.
قازاقستان اۋعان حالقىنا گۋمانيتارلىق كومەك كورسەتۋدى جالعاستىرا بەرەدى, ازىق-ت ۇلىك, ءدارى-دارمەك, ەڭ الدىمەن, قاجەتتى باسقا دا تاۋارلار جەتكىزۋدى جۇزەگە اسىرادى, سونداي-اق اۋعان ستۋدەنتتەرىن وقىتۋعا مۇمكىندىكتەر بەرىلەدى.
سونىمەن قاتار جيىندا اۋعانستان ماسەلەسىنىڭ بارلىق سپەكترى بويىنشا ۇيلەستىرىلگەن كۇش-جىگەردىڭ ماڭىزدىلىعى ايتىلدى.
وتىرىس قورىتىندىسى بويىنشا قورىتىندى مالىمدەمە قابىلداندى. وندا حالىقارالىق تەرروريستىك ۇيىمداردىڭ اۋعانستان اۋماعىن ايماقتاعى ەلدەرگە قارسى كەز كەلگەن تەرروريستىك اكتىلەردى جاسىرۋ, وقىتۋ, جوسپارلاۋ نەمەسە قارجىلاندىرۋ ءۇشىن پايدالانىلۋعا جول بەرىلمەيتىنى اتاپ ءوتىلدى.
ديالوگقا قاتىسۋشىلار شەكارا ماڭى مەملەكەتتەرى مەن باسقا دا مۇددەلى ەلدەر اراسىندا دەسترۋكتيۆتى توپتاردىڭ قىزمەتىنە بايلانىستى احۋال تۋرالى جەدەل اقپارات الماسۋ جونىندەگى ىنتىماقتاستىقتى جولعا قويۋعا نيەتتى ەكەنىن راستادى.
بۇدان بولەك مەملەكەتتەردىڭ اۋعان حالقىنا گۋمانيتارلىق كومەك كورسەتۋگە كەدەرگىسىز قول جەتكىزۋدى قامتاماسىز ەتۋگە دەگەن ۇمتىلىسى اتاپ ءوتىلدى.
ءىس-شارا بارىسىندا عيزات نۇرداۋلەتوۆ رەسەي فەدەراتسياسى قاۋىپسىزدىك كەڭەسىنىڭ حاتشىسى نيكولاي پاترۋشەۆپەن, تاجىكستان رەسپۋبليكاسى قاۋىپسىزدىك كەڭەسىنىڭ حاتشىسى ناسرۋللا ماحمۋدزودامەن جانە قىرعىز رەسپۋبليكاسى قاۋىپسىزدىك كەڭەسىنىڭ حاتشىسى مارات يمانقۇلوۆپەن ەكىجاقتى كەزدەسۋلەر وتكىزدى.
جيىنعا قاتىسۋشىلار وڭىرلىك جانە جاھاندىق قاۋىپسىزدىكتىڭ نەگىزگى ماسەلەلەرى مەن وسى باعىتتاعى ىنتىماقتاستىقتىڭ نەگىزگى باعىتتارى بويىنشا پىكىر الماستى.