فرانتسيا استاناسى – پاريجدە ءوتىپ جاتقان تەننيستەن «ۇلكەن دۋلىعا» ساناتىنا جاتاتىن «رولان گارروس» ءتۋرنيرى قازاقستاندىق تەننيسشىلەر ءۇشىن ءوز مارەسىنە جەتتى. فرانتسيا اشىق بىرىنشىلىگىنىڭ نەگىزگى كەزەڭىندە ونەر كورسەتۋگە مۇمكىندىك العان قازاقستاننىڭ بەس وكىلى جارىستىڭ العاشقى اپتاسىندا-اق جەكەلەي سىندا دا, جۇپتىق باسەكەدە دە جەڭىلىپ, پاريج كورتتارىنداعى جورىقتارىن اياقتادى.
جەرلەستەرىمىزدەن سوڭعى بولىپ كورتقا ەلەنا رىباكينا (جەكەلەي) مەن الەكساندر بۋبليك (جۇپتىق) شىقتى. بىلتىرعى «رولان گارروستىڭ» شيرەك فينالىنا دەيىن جەتكەن قازاقستاننىڭ ايەلدەر اراسىنداعى ءبىرىنشى, الەمنىڭ 16-راكەتكاسى ەلەنا رىباكينا بيىل ءۇشىنشى اينالىمنان ارىگە اسا المادى. الەمدىك رەيتينگتەگى ورنىنا ساي فرانتسيا اشىق چەمپيوناتىنىڭ 16-راكەتكاسى بولىپ تىركەلگەن قازاقستاندىق تەننيسشى باستاپقى باسەكەدە دۇنيەجۇزىلىك رەيتينگتە 78-ورىندا تۇرعان نيدەرلاندتىق ارانچا رۋسپەن كەزدەسىپ, ءۇش سەتتە – 6:1, 7:5, 6:2 ەسەبىمەن باسىم تۇسكەن-ءدى. وسىعان دەيىن ەكى تەننيسشى ءوزارا ءبىر رەت ويناپ, وندا تاجىريبەلى رۋس جەڭىسكە جەتكەن بولاتىن. بۇل جولى ەلەنا رىباكينا ەسە قايتارا ءبىلدى.
ەكىنشى اينالىمدا جەرلەسىمىز رەيتينگتە 135-ورىندا تۇرعان 20 جاستاعى امەريكالىق كەتي ۆولىنەتسپەن شەبەرلىك بايقاستى. بۇل ولاردىڭ ءوزارا ءبىرىنشى كەزدەسۋى ەدى. ءبىرىنشى پارتيا سوڭىنا تامان ە.رىباكينا برەيك جاساپ, تارازى باسىن وزىنە اۋداردى – 6:4. ەكىنشى سەتتە قارقىنىن ءتىپتى ۇدەتىپ, قارسىلاسىنا بىردە-ءبىر گەيم بەرگەن جوق – 6:0. ءبىر ساعاتتان استام ۋاقىتقا سوزىلعان باسەكە بارىسىندا قازاقستاندىق سپورتشى ەش قيىندىقسىز ءۇشىنشى اينالىمعا جولداما الدى.
الايدا ءۇشىنشى اينالىمدا رەيتينگتە وزىنەن كەيىن (22-ورىن) ورنالاسقان امەريكالىق مەديسون كيزگە شاماسى جەتپەدى. ە.رىباكينا ءبىرىنشى پارتيادا برەيك جاساپ, 6:3 ەسەبىمەن جەڭىسكە جەتكەنىمەن, ەكىنشى سەتتە قارسىلاسى باسىمدىقتى ءوز قولىنا الىپ, 6:1 ناتيجەسىمەن ەسە قايتاردى. ءۇشىنشى, شەشۋشى پارتيادا ەسەپ 4:3 بولعان مەزەتتە قازاقستاندىق سپورتشىنىڭ برەيك جاسايتىنداي مۇمكىندىگى بولدى. بىراق تاي-برەيكتە جەڭىس امەريكالىقتىڭ ەنشىسىندە كەتتى – 7:6 (10:3).
ال جەكەلەي سىنعا قاراعاندا, جۇپتىق باسەكەدە ءتاۋىر ونەر كورسەتكەن الەكساندر بۋبليك تە شيرەك فينالعا شىعا المادى. اۋستراليالىق تاناسي كوككيناكيسپەن بىرگە جۇپ قۇراعان بۋبليك العاشقى اينالىمدا امەريكالىق ناتانيەل لاممونس پەن پولشالىق كاميل مايحشاكپەن كەزدەستى. قازاقستاندىق-اۋستراليالىق جۇپ ءبىرىنشى پارتيادا 7:5 ەسەبىمەن باسىمدىق تانىتسا, ەكىنشى سەتتە تاي-برەيكتە جەڭىستى ج ۇلىپ الدى – 7:6 (7:5). ەكىنشى اينالىمدا ماجارستاندىق مارتون فۋچوۆيچ پەن امەريكالىق فرەنسيس تيافو جۇبىمەن ويناپ, قارسىلاستارىنان ەكى سەتتە – 6:4, 6:3 ەسەبىمەن ەش قيىندىقسىز باسىم ءتۇسىپ, ءۇشىنشى اينالىمعا شىقتى.
وكىنىشكە قاراي, الەكساندر بۋبليك پەن تاناسي كوككيناكي French Open ءتۋرنيرىنىڭ شيرەك فينالىنا جولداما بەرۋشى ماتچتا ۇتىلىپ قالدى. قازاقستاندىق-اۋستراليالىق جۇپ بۇل كەزەڭدە يۆان دوديگ (حورۆاتيا) پەن وستين كرايچەككە (اقش) ەكى سەتتە – 3:6, 2:6 ەسەبىمەن جول بەردى.
ەرلەر اراسىنداعى قازاقستاننىڭ ءبىرىنشى راكەتكاسى ا.بۋبليك جەكەلەي سىننىڭ العاشقى اينالىمىندا دۇنيەجۇزىلىك رەيتينگتە 68-ورىندا تۇرعان فرانتسيالىق ارتۋر ريندەركنەحپەن شەبەرلىك بايقاسىپ, 6:2, 6:4, 6:4 ەسەبىمەن جەڭىسكە جەتتى. بۇعان دەيىن قارسىلاستار ءوزارا ەكى رەت كەزدەسىپ, ەكەۋىندە دە فرانتسيالىق سپورتشىنىڭ مەرەيى ۇستەم بولعان ەدى. بۋبليك وسىلايشا جەكە كەزدەسۋدىڭ ەسەبىن قىسقارتتى. دەگەنمەن قازاقستاندىق تەننيسشى ەكىنشى اينالىمدا الەمنىڭ 31-راكەتكاسى سەربيالىق ميومير كەچمانوۆيچتەن ايلاسىن اسىرا المادى. اسا تارتىستى وتكەن كەزدەسۋدە سەربيالىق تەننيسشى ءبىرىنشى سەتتە بۋبليككە ەسە جىبەرگەنىمەن (6:4), قالعان ءۇش سەتتە باسىم بولدى – 5:7, 2:6, 1:6.
سونداي-اق جەكەلەي باسەكەدە ونەر كورسەتكەن ءۇشىنشى تەننيسشىمىز يۋليا پۋتينتسەۆا دا ەكىنشى اينالىمنان كەرى قايتتى. الەمنىڭ 37-راكەتكاسى ءبىرىنشى اينالىمدا دۇنيەجۇزىلىك رەيتينگتە 112-ورىندا تۇرعان, نەگىزگى جارىسقا ىرىكتەۋ سايىستارىنان كەيىن قوسىلعان رۋمىنيالىق يرينا بارامەن كەزدەسىپ, قارسىلاسىن ەكى سەتتە – 6:3, 6:1 ەسەبىمەن تىزە بۇكتىرگەنىمەن, ەكىنشى اينالىمدا الەمنىڭ 30-راكەتكاسى يتاليالىق كاميلا دجوردجيدەن جەڭىلدى – 3:6, 5:7.
قازاقستاننىڭ جۇپتىق سىنداعى ءبىرىنشى, الەمنىڭ 20-راكەتكاسى اننا دانيلينا دا قازاقستاندىق جانكۇيەرلەردىڭ سەنىمىن اقتاي المادى. برازيليالىق بەاتريس حادداد مايامەن جۇپ قۇراعان ول العاشقى اينالىمدا جاپونيالىق ەري حودزۋمي مەن ماكوتو نينوميانى 4:6, 6:4, 6:4 ەسەبىمەن تىزە بۇكتىرگەنىمەن, دانيلينا مەن مايا ەكىنشى اينالىمدا تايبەيلىك لاتيشا چان مەن اۋستراليالىق سامانتا ستوسۋردىڭ سىنىنان وتە المادى – 3:3, 2:6.
سونىمەن قاتار قازاقستاننىڭ جۇپتىق سىنداعى ءبىرىنشى (ەرلەر), الەمنىڭ 21-راكەتكاسى اندرەي گولۋبەۆ ەكىنشى اينالىمنان اسا المادى. ول فرانتسيالىق فابريس مارتەنمەن بىرگە دودانىڭ 16-راكەتكالارى ۇندىستاندىق روحان بوپاننا – نيدەرلاندتىق ماتۆە ميددەلكوپقا جول بەردى – 3:6, 4:6.