تۇرعىندارى باسىم بولىگىنىڭ قالالاردا شوعىرلانۋىنا بايلانىستى قاراعاندى ايماعىندا اۋىلشارۋاشىلىق ونىمدەرى ءتۇر-ءتۇرىن كوبەيتۋدىڭ كوكەيكەستىلىگى قاشاندا كۇن تارتىبىنەن تۇسكەن ەمەس, كەيىنگى كەزدە ءتىپتى ۇستەمەلەپ كەتكەندەي. سونىڭ جاعىمدى نىشاندارى بارىنشا بايقالىپ وتىر دەۋگە بولادى. باستى ىرىس استىقپەن ءبىرگە زىعىر, بۇرشاق, تارى, كۇنباعىس سياقتى داقىلدار القابىنىڭ كولەمى ودان سايىن ارتىپ كەلەدى. اسىرەسە, كارتوپ ءوسىرۋدى ۇلعايتۋعا ايتارلىقتاي بەتبۇرىس بار. بۇل رەتتە بۇرىننان دا داعدىلى ءونىم بولۋى, كۇتىپ-باپتاپ, جيناۋدا تاجىريبە جەتكىلىكتىلىگى, ونى جەتىلدىرىپ قولدانۋ وبلىستىڭ ءوزىن-ءوزى تولىق قامتاماسىز ەتىپ قانا قويماي سىرت جەرلەرگە دە جونەلتۋگە مۇمكىندىك تۋعىزىپ ءجۇر.
بىلتىر 286 مىڭ تونناسى قويماعا ساقتاۋعا سالىنسا, بيىل دا وسىنشا مولشەردەن كەم تۇسپەۋ ەكىنشى نان وندىرۋشىلەردىڭ الدىنداعى ماقسات. ياعني, مىندەت ۇلكەيمەسە كەمىگەن جوق. رەسمي دەرەك بويىنشا 9 مىڭ تونناعا جۋىق تۇقىم بۇعان كەپىل بولۋعا ءتيىس. الايدا, بۇيىردەن كيلىككەن ءبىر كەدەرگى كوپشىلىكتى مازاسىزداندىرۋدا.
قيىنى سول, كارتوپ تۇقىمىنا ءزارۋلىك ەرتەڭ وتىرعىزۋ ناۋقانى باستالعاندا قاتتى ءبىلىنۋى مۇمكىن. وكىنىشكە قاراي, ەلىمىزدە ونى بۇرىنعىسىنشا شەتەلدەن اكەلۋگە شەكتەۋ سالىنعانى ءمالىم. وسى توڭىرەكتەگى ءاڭگىمەنىڭ كۇردەلەنۋى سودان شىعادى. مامانداردىڭ ايتۋىنشا, ول تۇقىمنىڭ وتاندىق ءوندىرىسىن قولداۋعا قاتىستى شارا بولعانىمەن قورداعى بارى ەگجەي-تەگجەيلى ەسەپتەلىپ, جەتكىلىكتى نە جەتكىلىكسىزدىگى ەسكەرىلمەۋى سالدارى كارتوپ وتىرعىزۋشىلار ءبارىنىڭ قولى جەتپەۋىنە ۇرىندىرعالى تۇرعان سىڭايلى. ولاي تارت, بىلاي تارت, ءوز تۇقىمىمىزدىڭ تاپشىلىق ەتۋى كوكتەمگى ەگىسكە ازىرلەنۋشىلەردى الاڭداتقان جاي ەكەنى شىندىق. مۇنى دا بىلاي قويعاندا, جاعدايدى كارتوپتىڭ ءبىزدەگى تۇقىمىن الىس-جاقىننان بارىمتالاۋشىلار شىقپاي قالماۋى ءار ءتۇيىرىن التىنداي قالاتىپ جاتسا تاعى تاڭدانىس جوق.
ايماقتا كارتوپ وسىرۋمەن نەگىزىنەن اباي, بۇقار جىراۋ اۋداندارى شۇعىلدانادى. كوكسۋداعى, ەسەنكەلدىدەگى, جاڭاتۇرمىستاعى, روستوۆكاداعى شارۋاشىلىقتار وسى سالانىڭ ىرىلەرى سانالادى. ال تۇقىمىن سۇرىپتاۋ, دايىنداۋمەن اينالاساتىنى بىرەۋ-ەكەۋدەن اسپايدى. وبلىس تۇگىلى, اۋدان سۇرانىسىن قامتاماسىز ەتۋگە شاماسى شامالى ولاردىڭ قاتارىن تولىقتىرۋعا ق ۇلىقتىلار از.
باعانىڭ ونسىز دا شارىقتاۋى شاعىندا شىعاننان بولسا دا قاجەتتى تۇقىم ساتىپ الۋعا توسقاۋىل قويۋ جەرگىلىكتى ءتۇرى قۇنىن قىمباتتاتىپ جىبەردى. بۇعان دەيىن ۇساعىنىڭ ءوزىن ءار كيلوسىنا 30-40 تەڭگەگە ساۋدالاسۋشىلار ەندى 60-70 تەڭگەگە قول جەتكىزۋگە زار. مۇنداي قىمباتقا تۇسكەن تۇقىم ءونىمىن وندىرۋشىلەر البەتتە, شىعىن ورنىن تولتىرعىسى كەلەتىنى انىق. سوندىقتان كۇزدە كيلوسى 100 تەڭگەدەن اسىپ جىعىلسا وعان دا قايران شامالى.
جالپى العاندا, وسىنداي تىعىرىقتىڭ كۇندەردىڭ كۇنىندە الدان شىعاتىندىعى كارتوپ وندىرۋشىلەرگە ءمالىمسىز ەمەس ەدى. تۇقىمدى الىستان ارقالاپ جەتكىزۋگە ۇيىرلىك اقىرى سوعان تىرەدى. جيىن-تەرىم اياقتالعان بەتتە تۇگىن قالدىرماي ساتىپ, پايدا تابۋ امالىنان اسپاۋ مىنەكي, بۇگىندە جان-جاقتان تۇقىم ىزدەۋگە سابىلتىپ جاتىر. ارينە, بارىندە ولاي ەمەس. كارتوپتىق 570 گەكتار القاپتىڭ 30 پايىزىن تۇقىمدىق تاناپقا ارناعان, قازىر ارقاسى كەڭ كيروۆ اتىنداعى وندىرىستىك كووپەراتيۆ, «استرو-اگرو» جشس سياقتىلار ازىرگە نەكەن-ساياق. سونداي بولماسا دا ۇقساپ باعۋعا مۇمكىندىك بارشىلىق. «قازاگرو» ۇلتتىق باسقارۋ حولدينگى ارقىلى «اگروبيزنەس-2020» باعدارلاماسى بويىنشا جەڭىلدەتىلگەن نەسيە الىپ, وتە-موتە كەرەكتى ءىس رەتىن كەلتىرۋگە بولادى. بىراق ەرتەڭگىگە قالدىرا بەرىلسە نە دەرسىز. ال تۇقىم قورى قالانبايىنشا الىس-جاقىنعا قول سوزۋ بىتپەك ەمەس.
ايقىن نەسىپباي,
«ەگەمەن قازاقستان».
قاراعاندى وبلىسى.