اقمولا وبلىسى جاستار رەسۋرستىق ورتالىعىنىڭ ۇيىمداستىرۋىمەن بۋراباي اۋدانىنداعى ششۋچينسك قالاسىنىڭ پەداگوگيكالىق كوللەدجىندە رەفەرەندۋمنىڭ ءمان-ماڭىزىن تۇسىندىرۋگە ارنالعان ديالوگ الاڭى ۇيىمداستىرىلدى.
دەنى جاستار قاتىسقان ءىس-شاراعا وبلىستىق جانە وڭىرلىك جاستار رەسۋرستىق ورتالىقتارىنىڭ قىزمەتكەرلەرى, ستۋدەنتتەر, جاستار ۇيىمدارىنىڭ باسشىلارى مەن كوشباسشىلارى بەلسەندى قاتىستى. سونداي-اق پىكىرتالاس الاڭىنا كەلگەن بۋراباي اۋدانىنىڭ اكىمى اسەت مۇزدىباەۆ, Amanat پارتياسى قوعامدىق ساياسات ينستيتۋتى ديرەكتورىنىڭ ورىنباسارى دينارا سادۋاقاسوۆا, «ۇلان-عايىر دالا ەلى» قوعامدىق بىرلەستىگىنىڭ جەتەكشىسى, قازاقستان حالقى اسسامبلەياسىنىڭ مۇشەسى ۆاليحان باحرەتدينوۆ, «جاستار قىزمەتكەرلەرى قاۋىمداستىعى» قب توراعاسى نۇرلىباي ناۋرىزباەۆ جانە «ەسىرتكىسىز بولاشاق» كق اتقارۋشى ديرەكتورى جاندوس اقتاەۆ جاستارعا كونستيتۋتسياعا ەنگىزىلەتىن وزگەرىستەر مەن تولىقتىرۋلاردىڭ ماڭىزدىلىعىن ءتۇسىندىرىپ, الداعى رەفەرەندۋمعا بەلسەندى اتسالىسۋعا شاقىردى.
ءىس-شارانىڭ مودەراتورى, «قازاقستان جاستار كونگرەسى» قاۋىمداستىعى نىسانىنداعى زاڭدى تۇلعالار بىرلەستىگىنىڭ اتقارۋشى ديرەكتورى, جاستار ءىسى جونىندەگى كەڭەستىڭ مۇشەسى توقتار بولىسوۆ رەفەرەندۋمنىڭ جولداۋدا جاريالانعان رەفورمالاردى حالىقتىڭ تاڭداۋىمەن جۇزەگە اسىرۋعا جول اشاتىنىن اتاپ ءوتتى. «مەملەكەت باسشىسى ارقاشاندا ازاماتتاردى شەشىم قابىلداۋعا بەلسەندى قاتىسۋعا شاقىرىپ كەلەدى. كونستيتۋتسيالىق وزگەرىستەر بويىنشا ەندى ارالاس سايلاۋ جۇيەسى ارقىلى پارتياعا مۇشە ەمەس ازاماتتار دا پارلامەنتكە سايلانا الادى. ەگەر رەفەرەندۋمدا داۋىس بەرۋشىلەر وسى وزگەرىستەردى قولداسا, وندا ءبىز پرەزيدەنت ايتقان جاڭا, ادىلەتتى قازاقستان قۇرۋعا مۇمكىندىك الامىز. بۇل – ەلىمىزدىڭ دامۋى ءۇشىن ماڭىزدى قادام», دەدى ول.
«رەفەرەندۋمعا قاتىسىپ, اشىق پىكىر ءبىلدىرۋ, قوعامعا ءۇن مەن ۇلەسىن قوسۋ ەلىمىزدىڭ بولاشاعىنا, جاڭا ومىرىنە قادام جاسايتىن ماڭىزدى كۇن ەكەنىن ەستەن شىعارماعان ءجون. بارلىعىمىز بىرلىگى جاراسقان ەل بولىپ جۇمىلساق قانا ءوزىمىز قالاعانداي بەرەكەلى ءارى بەيبىت جاڭا قازاقستاندى قۇرا الامىز. بۇل ساياسي ناۋقان – ەل ومىرىندەگى تاريحي ءسات. وسى ءساتتى پايدالانا وتىرىپ, مەملەكەتىمىزدىڭ بولاشاعى ءۇشىن مۇددەسىن ارتتىرۋ بارشامىزدىڭ ابىرويلى مىندەتىمىز ەكەنىن ايتقىم كەلەدى», دەدى باسقوسۋدا ءسوز العان نۇرلىباي ناۋرىزباەۆ. ال ەلىمىزدىڭ ۇلكەن وزگەرىستەر الدىندا تۇرعانىن ەسكە سالعان جاندوس اقتاەۆ مەملەكەتتىڭ دامۋى تىكەلەي وسى رەفەرەندۋمعا بايلانىستى ەكەنىن ايتتى.
جيىنعا قاتىسقان جاستار مەن ساراپشىلار الداعى رەفەرەندۋمعا, كونستيتۋتسياعا ەنگىزىلەتىن تۇزەتۋلەرگە وڭ كوزقاراسپەن قارايتىندىقتارىن ايتىپ, ەلىمىزدىڭ وركەندەۋىنىڭ ىرگەتاسى قالاناتىنىنا سەنىم ءبىلدىردى. كەزدەسۋ سوڭىندا قاتىسۋشىلار قوناقتارعا وزدەرىن قىزىقتىرعان سۇراقتارىن قويىپ, قوسىمشا اقپاراتتارعا قانىقتى.
اقمولا وبلىسى