ەلورداداعى №49 مەكتەپكە الاش ارداقتىسى قوشكە كەمەڭگەر ۇلىنىڭ ەسىمى بەرىلدى. وقۋ وشاعىنا الاش قايراتكەرى, جازۋشى, دراماتۋرگ, ادەبيەتشى, ءتىلشى, تاريحشى, كوسەمسوز شەبەرى قوشكە كەمەڭگەر ۇلى ەسىمىنىڭ بەرىلۋىنە بايلانىستى حالىقارالىق عىلىمي-تەوريالىق كونفەرەنتسيا ءوتتى. «باقىتتى كەلەشەكتەن ءۇمىت ءجىبىن كەسپەيمىن» اتتى سالتاناتتى ءىس-شاراعا قالامگەر قوشكە كەمەڭگەر ۇلى ۇرپاقتارى, زيالى قاۋىم وكىلدەرى, مەكتەپ مۇعالىمدەرى, وقۋشىلارى, اتا-انالار قاۋىمداستىعى قاتىستى.
جيىندا ءماجىلىس دەپۋتاتتارى قازىبەك يسا, امانجول ءالتاي, ش.شاياحمەتوۆ اتىنداعى ء«تىل – قازىنا» ورتالىعىنىڭ ديرەكتورى ەربول تىلەشوۆ, نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ, پاۆلودار وبلىسىنىڭ ءبىلىم بەرۋ باسقارماسى, باياناۋىل اۋدانى ءبىلىم بەرۋ ءبولىمىنىڭ ق.كەمەڭگەر ۇلى اتىنداعى جالپى ءبىلىم بەرەتىن ورتا مەكتەپ ديرەكتورى ماديان كابدۋوۆا, قازاقستان جازۋشىلار وداعى نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلى قاتىسىپ, قۇتتىقتاۋ سوزدەرىن ايتتى.
كونفەرەنتسيادا ۇعا اكادەميگى ديحان قامزابەك ۇلى, ل.ن.گۋميلەۆ اتىنداعى ەۇۋ قازاق ادەبيەتى كافەدراسىنىڭ پروفەسسورى سەرىك نەگيموۆ, م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى گۇلجاھان وردا, فيلولوگيا ماگيسترى, ەگە ۋنيۆەرسيتەتى تۇرىك الەمىن زەرتتەۋ ينستيتۋتىنىڭ قىزمەتكەرى ديليارا گوكچە, ادەبيەتتانۋ بويىنشا PhD دوكتورى بەكارىس نۇريمان, ت.ب. عالىمدار مەن زەرتتەۋشىلەر بايانداما جاسادى.
كەلگەن قوناقتارعا ءبىلىم ورداسىنىڭ باسشىسى اراي مۇحامەتجانوۆا مەكتەپتىڭ جەتىستىكتەرى مەن يننوۆاتسيالىق جانە شىعارماشىلىق جۇمىستاردىڭ كورمەسىمەن تانىستىردى. وسىدان سوڭ قوشكەتانۋ ورتالىعىندا قالامگەر ءمۇسىنىنىڭ سالتاناتتى تۇردە اشىلۋى بولدى.
ءمۇسىندى اشۋ قۇرمەتى قوشكە كەمەڭگەر ۇلىنىڭ نەمەرەسى, ارداگەر ۇستاز, «رف ءبىلىم بەرۋ ءىسىنىڭ ۇزدىگى» توسبەلگىسىنىڭ يەگەرى ريزابەك نارمانبەت ۇلى مەن قازاق جەرىن لەنيننىڭ الدىندا قورعاپ, شەكاراسىن شەگەندەگەن ءالىمحان ەرمەك ۇلىنىڭ, زاڭگەر, ەتنوگراف جاقىپ اقباەۆتىڭ جانە حالىق كومپوزيتورى, وتكىر ءتىلدى سۋىرىپ سالما اقىن ءيمانجۇسىپ قۇتپان ۇلىنىڭ ۇرپاقتارىنا بەرىلدى.
عىلىمي كونفەرەنتسيا سوڭىندا قارار قابىلدانىپ, بەكىتىلدى. كونفەرەنتسيادان كەيىن مەكتەپتىڭ تالانتتى وقۋشىلارى قوشكە تۋىندىلارىن مانەرىنە كەلتىرە وقىدى. قازاق ءتىلى مەن ادەبيەتى ءپانىنىڭ مۇعالىمى جانات ەگىنبايقىزىنىڭ جەتەكشىلىگىمەن مەكتەپتىڭ جاس ماماندارىنان قۇرالعان «جاس قانات» تەاترىنىڭ ارتىستەرى قوشكەنىڭ 1926 جىلى قىزىلوردا قالاسىندا مەملەكەتتىك ۇلت تەاترىنىڭ رەسمي اشىلۋىندا قويىلعان «التىن ساقينا» پەساسىن ساحنالادى. سالتاناتتى ءىس-شارا قوشكە ۇرپاقتارى جانە مەكتەپتىڭ دومبىراشىلار ءانسامبلىنىڭ ورىنداۋىنداعى كۇمبىرلەگەن كۇيمەن تۇيىندەلدى.