پاۆلودار وبلىسىنىڭ ورتالىعىنداعى م.م.كاتاەۆ اتىنداعى وقۋشىلار سارايىنىڭ الاڭىندا «بالالىق شاقتىڭ اسپانى» اتتى بالالار فەستيۆالى ءوتتى. ءسان-سالتاناتى كەلىسكەن ءىس-شارا بالدىرعاندارعا بالالار جىلىنىڭ شاتتىعىن سەزىندىردى.
وبلىستىق ءبىلىم باسقارماسى تاربيە جۇمىسى جانە قوسىمشا ءبىلىم بەرۋ ءبولىمىنىڭ باسشىسى بەكباتىر ايتماحاننىڭ ايتۋىنشا, فەستيۆالدىڭ ماقساتى – بالالاردىڭ شىعارماشىلىق, زياتكەرلىك قابىلەتتەرىن دامىتۋ جانە قولداۋ, بوس ۋاقىتتى ءتيىمدى وتكىزۋگە باۋلۋ. بالالار جىلىن مەرەكەلەۋ اياسىندا ءبىر اي ىشىندە ءارتۇرلى ءىس-شارالار وتكىزىلەدى دەپ جوسپارلانۋدا.
Amanat پارتياسى وبلىستىق فيليالىنىڭ اتقارۋشى حاتشىسى يليا تەرەنچەنكو بالالار جىلى تارتىمدى ءوتۋى ءۇشىن ەرەسەكتەر بار كۇش-جىگەرىن سالۋى كەرەك ەكەنىن ايتتى.
– بارلىق ۇيىمداستىرۋشىلارعا, مۇعالىمدەرگە, وقىتۋشىلارعا, اتا-انالارعا العىس ايتامىن. ولار فەستيۆالدى قىزىقتى وتكىزۋگە بەلسەندى اتسالىستى. ءبىزدىڭ وڭىردە بالالاردى الەۋمەتتىك قولداۋدىڭ ەڭ ءىرى پاكەتى بار. بۇل رەتتە قامقورلىق ءىس-شارالارى ۇزدىكسىز جالعاساتىن بولادى, – دەدى ي.تەرەنچەنكو.
فەستيۆالدە قالا مەكتەپتەرىنىڭ وقۋشىلارى ءۇشىن ويىن-ساۋىق باعدارلاماسى, ءتۇرلى ويىندار مەن شەبەرلىك سىنىپتارى ۇيىمداستىرىلدى.
پاۆلودار وبلىسى