قر ءىىم اكىمشىلىك پوليتسيا كوميتەتى توراعاسىنىڭ ورىنباسارى جاندوس مۇراتاليەۆ ەلىمىزدە ءاربىر بەسىنشى جول اپاتىنان كامەلەتكە تولماعان بالا زارداپ شەگەتىنىن ايتتى, دەپ حابارلايدى Egemen.kz.
«جىل سايىن جول اپاتىنان 200-گە جۋىق بالا كوز جۇمىپ, 3 مىڭنان استامى ءارتۇرلى دەنە جاراقاتىن الادى. وتكەن جىلدان باستاپ مەكتەپ وقۋشىلارىنا جولدا قاۋىپسىز ءجۇرىپ-تۇرۋدى ءتۇسىندىرۋ ساباقتارى وتكىزىلگەن جوق. بۇل قازىردىڭ وزىندە جالپى جاعدايعا كەرى اسەر ەتىپ وتىر», دەدى جاندوس مۇراتاليەۆ ۆەدومستۆودا وتكەن ءباسپاسوز ءماسليحاتى بارىسىندا.
ونىڭ ايتۋىنشا, جول-كولىك وقيعاسىنان زارداپ شەگەتىن بالالاردىڭ باسىم بولىگى كولىك ىشىندە بولادى.
«كوپ جاعدايدا ەرەسەكتەر كولىكتە تاسىمالداۋ ەرەجەسىن ساقتاماي, ياعني بالالاردى ارنايى قۇرالسىز نەمەسە بەلبەۋمەن بەكىتپەي تاسىمالدايدى. سونىمەن قاتار جاياۋ جۇرگىنشىلەردىڭ كىناسىنەن بولاتىن جول-كولىك وقيعالارىنىڭ نەگىزگى سەبەبى - جول بەلگىسى جوق جەردەن كەسىپ ءوتۋ نەمەسە باعدارشامنىڭ قىزىل ءتۇسىن ەلەمەۋ. جىل باسىنان بەرى ەل اۋماعىندا 92 كامەلەتكە تولماعان جاياۋ جۇرگىنشىنى قاعىپ كەتۋ دەرەگى تىركەلدى. ونىڭ ىشىندە 5 بالا قازا تاۋىپ, 97-ءسى جاراقات العان», دەيدى ول.