بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا ءماجىلىس دەپۋتتارىنىڭ ساۋالىنا جولداعان جاۋابىندا ايتتى, دەپ حابارلايدى Egemen.kz.
«سانكتسيالىق تالاپتار اياسىندا جەكەلەگەن شەتەلدىك بانكتەر – «سبەربانك» اق ەنشىلەس بانكىنىنىڭ, «الفا-بانك» اق ەنشىلەس بانكىنىڭ جانە «بانك ۆتب (قازاقستان)» اق ەنشىلەس ۇيىمىنىڭ شەتەل ۆاليۋتاسىنداعى كوررەسپوندەنتتىك شوتتارى بۇعاتتالعان.
اتالعان بانكتەردىڭ مالىمەتىنشە, سالدارىنان جالپى سوماسى شامامەن 9,2 ملرد تەڭگە («سبەربانك» اق ەب بويىنشا – 2,7 ملرد تەڭگە, «الفا-بانك» اق ,ەب بويىنشا – 6,2 ملرد تەڭگە, «بانك ۆتب (قازاقستان)» اق ەۇ بويىنشا – 0,3 ملرد تەڭگە) بولاتىن قالدىقتارعا شەكتەۋ قويىلعان. بۇدان باسقا «سبەربانك» اق ەنشىلەس بانكىنىڭ جەكەلەگەن كليەنتتەرىنىڭ 2,9 ملرد تەڭگە بولاتىن شەتەل ۆاليۋتاسىنداعى تولەمدەردى بۇعاتتاعان.
«الفا-بانك» اق ەنشىلەس بانكىنىڭ جەكەلەگەن كليەنتتەرىنىڭ 3,9 ملرد تەڭگە بولاتىن شەتەل ۆاليۋتاسىنداعى تولەمدەر مەن اۋدارىمدارى بۇعاتتالدى. قازىرگى تاڭدا بانكتىڭ جاڭا اكتسيونەرى «بانك تسەنتركرەديت» اق بانكتى اقش پەن بىرقاتار باسقا ەلدەردىڭ سانكتسيالىق تىزىمىنەن شىعارۋ جۇمىستارىن جۇرگىزۋدە» دەپ جازىلعان جاۋاپتا. اگەنتتىك باسشىسىنىڭ دەرەگى بويىنشا, «بانك ۆتب (قازاقستان)» اق ەنشىلەس ۇيىمىنىڭ كليەنتتەرىنىڭ تولەم جانە اۋدارىم وپەراتسيالارى شەڭبەرىندە قاراجاتتاردى وقشاۋلاۋ نەمەسە بۇعاتتاۋ فاكتىلەرى جوق.
سونداي-اق ول اتالعان ەنشىلەس بانكتەردىڭ باسىنداعى پروبلەمانىڭ سالدارىنان شىعىن كوردىم دەپ ەسەپتەيتىن قازاقستاندىقتار سوتقا جۇگىنە الاتىنىن ايتادى. «سبەربانك» اق ەنشىلەس بانكى جانە «الفا-بانك» اق ەنشىلەس بانكى قاراجاتىن بۇعاتتاۋ جانە ولاردىڭ كليەنتتەرىنىڭ قاراجاتىن وقشاۋلاۋعا بايلانىستى قالىپتاسقان جاعداي سىرتقى گەوساياسي تاۋەكەلدەرگە بايلانىستى. وسى ورايدا كليەنتتەر ەكى بانككە قاتىستى شىعىندارىن وتەپ الۋ ءۇشىن ازاماتتىق تالاپ ارىز بەرگەن جاعدايدا بانكتەر سوت ورگاندارىنىڭ شەشىمدەرىنە سايكەس بۇل تالاپتى قاناعاتتاندىرادى», دەپ جازادى ءمادينا ابىلقاسىموۆا.