ارنايى قۇرىلعان كوميسسيا شىمكەنت قالاسىنداعى جارىلىس شىعىنىن ەسەپتەپ جاتىر. وقيعادان كوپقاباتتى ءۇي, كولىكتەر عانا ەمەس, وبلىستىق پەريناتالدىق ورتالىقتىڭ عيماراتى مەن قىمبات مەديتسينالىق قۇرال-جابدىقتار زارداپ شەككەنى بەلگىلى, دەپ حابارلايدى Egemen.kz.
توتەنشە جاعداي ورىن العان جەردىڭ جانىندا ءبىرىنشى قاباتتا جانساقتاۋ ءبولىمى ورنالاسقان. وندا شالا تۋعان نارەستەلەر جاتقان ەدى. ۇشەمنىڭ ءبىرى قايتىس بولدى.
بريفينگتە قوعامدىق دەنساۋلىق ساقتاۋ باسقارماسىنىڭ باسشىسى مارات ءپاشىموۆ ولاردىڭ اناسىنىڭ قايعىلى وقيعادان بىرنەشە ساعات بۇرىن تاعى ءبىر بالاسىنان ايىرىلعانىن مالىمدەدى.
جەرگىلىكتى اكىمدىك قازا تاپقان ءۇش ادامنىڭ وتباسىنا ماتەريالدىق كومەك كورسەتەدى. قازا بولعاندار اراسىندا پەرزەنتحانانىڭ كۇزەتشىسى مەن بريگادا قۇرامىندا كۇردەلى جوندەۋ جۇمىستارىن جۇرگىزىپ جاتقان قۇرىلىس كومپانياسىنىڭ قىزمەتكەرى دە بار. قازىر دارىگەرلەر اپات سالدارىنان زارداپ شەككەندەردىڭ ءومىرى ءۇشىن كۇرەسىپ جاتىر. ولاردىڭ اراسىندا پەريناتالدىق ورتالىق قىزمەتكەرلەرى: سانيتارلار, مەدبيكە جانە پەرزەنتحاناعا ينتەرنەت ورناتۋعا كەلگەن تاعى ءبىر ەر ادام بار. ناۋقاستاردىڭ جاعدايى ەرەكشە باقىلاۋعا الىندى.
بۇگىندە №1 وبلىستىق پەريناتالدىق ورتالىقتىڭ پاتسيەنتتەرى №2 وبلىستىق پەريناتالدىق ورتالىقتىڭ عيماراتىنا, شىمكەنت قالاسىنىڭ №1, 2 قالالىق اۋرۋحانالارىنا, قالالىق پەريناتالدىق ورتالىققا جانە وبلىستىق بالالار اۋرۋحاناسىنا كوشىرىلدى. ولار دارىگەرلەر مەن پسيحولوگتاردىڭ تۇراقتى باقىلاۋىندا تۇرعانىن كەشە وڭىردە وتكەن ءباسپاسوز كونفەرەنتسياسىندا دسم انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا حابارلادى.
«تۇركىستان وبلىسى قوعامدىق دەنساۋلىق باسقارماسىنىڭ باستىعى مارات پاشيموۆپەن جانە مەديتسينالىق ۇيىمداردىڭ ءبىرىنشى باسشىلارىمەن بىرلەسىپ, جارىلىس كەزىندە زارداپ شەككەندەر جاتقىزىلعان كلينيكالاردى ارالاپ شىقتىق. ەكى پاتسيەنتتىڭ جاعدايى تۇراقتى, ورتاشا اۋىر جاعدايدا 7 پاتسيەنت بار, قاجەتتى بەيىندى مەديتسينالىق كومەك تولىق كولەمدە كورسەتىلدى. ناۋقاستارمەن اڭگىمە جۇرگىزىلدى, كورسەتىلەتىن مەديتسينالىق كومەكتىڭ ساپاسىنا پاتسيەنتتەر قاناعاتتاندى», دەپ حابارلادى مينيسترلىك وكىلى.