قازاقستان رەسپۋبليكاسى ازاماتتىق اۆياتسيا كوميتەتىنىڭ دەلەگاتسياسى ەۋروكوميسسيانىڭ ۇشۋ قاۋىپسىزدىگى كوميتەتىنىڭ وتىرىسىندا ءسوز سويلەدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
كەزدەسۋدە قازاقستاندىق دەلەگاتسيا قازاقستاننىڭ ۇشۋ قاۋىپسىزدىگى سالاسىنداعى ىلگەرىلەۋى مەن شارالارى تۋرالى ايتىپ بەردى. سونداي-اق ساراپشىلار حالىقارالىق ازاماتتىق اۆياتسيا ۇيىمىنىڭ (يكاو) اۋديتورلارىنىڭ يكاو-نىڭ ۇيلەستىرىلگەن ۆاليداتسيالىق ميسسياسى (ICVM) شەڭبەرىندە تاۋەلسىز تەكسەرۋى تۋرالى باياندادى. وندا قازاقستان ۇشۋ قاۋىپسىزدىگىن قامتاماسىز ەتۋ دەڭگەيىن 74 پايىزدان 84 پايىزعا دەيىن ارتتىردى, بۇل ورتاشا الەمدىك كورسەتكىشتەن 15 پايىزعا جوعارى.
ەو ۇشۋ قاۋىپسىزدىگى كوميتەتىنىڭ مۇشەلەرى قازاقستاننىڭ قول جەتكىزگەن ناتيجەلەرىن جوعارى باعالاي كەلە قازاقستاننىڭ ۇشۋ قاۋىپسىزدىگى دەڭگەيىن ارتتىرۋ جونىندەگى كۇش-جىگەرىن قۇپتادى.«قازىرگى ۋاقىتتا قازاقستاندىق اۋە كومپانيالار ءۇشىن ەۋروپا ەلدەرىنە ۇشۋعا شەكتەۋلەر جوق ەكەنىن اتاپ ءوتۋ قاجەت. قازاقستانداعى ۇشۋ قاۋىپسىزدىگى بويىنشا قازىرگى جاعدايدى رەسمي باعالاۋدى ەۋروپالىق وداق وسى جىلعى ماۋسىمنىڭ باسىندا جاريالايدى», دەلىنگەن حابارلامادا.
ايانا توعانبەك