بۇگىن ۇلت ۇستازى احمەت بايتۇرسىن ۇلىنىڭ تۋعان جەرىندە سالىنۋى ءتيىس قۇرىلىس نىسانى توڭىرگەندە داۋ شىقتى, دەپ حابارلايدى Egemen.kz.
الەۋمەتتىك جەلىدە قوستاناي وبلىسى جانگەلدين اۋدانى سارىتۇبەك اۋىلىندا ورنالاسقان احمەت بايتۇرسىن ۇلىنىڭ تۋعان ءۇيىنىڭ ءسۇرىلىپ, قايتا سالىنىپ جاتقانى تۇسىرىلگەن بەينەجازبا تارادى. اۆتوردىڭ ايتۋىنشا, قۇرىلىسپەن اينالىسىپ جاتقان مەردىگەر جاۋاپسىزدىق تانىتىپ وتىر.
«بۇگىن قوستاناي وبلىسى, جانگەلدين اۋدانى, سارىتۇبەكتەگى احمەت اتانىڭ تۇگەل ءسۇرىلىپ, قايتا تۇرعىزىلعالى جاتقان قۇرىلىس باسىنا بارعانبىز. قۇرىلىس جونىندە جاريالانعان تەندەردى سىرتتان كەلگەن جىگىتتەر ۇتىپ العان ەكەن. ال مىنا باستاعان قۇرلىستارىنا مۇلدە كوڭىل تولمايدى. ويلارىنا ەرەن تۇلعاعا ارەڭ دەگەندە, زارىعىپ جەتىپ سالىنىپ جاتقان دۇنيە ەكەنى كىرىپ تە شىقپايدى. اڭگىمەلەرىنە قاراساڭ, تۋرا ءبىر جاي ساراي تۇرعىزىپ جاتقان سياقتى. پروەكتىنى وقيىق, سىزباسىندا قاي جەرىندە قانداي ماتەريال قاجەت دەپ جازىپتى, كورەيىك دەسەك, كورسەتپەيدى. ال قۇيعان فۋندامەنتتەرى مۇلدە تالاپقا ساي ەمەس. اۋىلدا قورانىڭ ىرگەتاسىنا سالىناتىن تاستاردان قالاپ جاتىر. قابىرعاسىنا دەگەن كىرپىشتەرىنىڭ دە ساپاسى تومەن. ءارى كەتسە ەكى-ءۇش جىلدا مىنا ىرگەتاس پەن مىنا كىرپىش جارىلادى.
قۇرىلىس جايىن اقكولدەگى قوجا اعامىز اۋدان اكىمىنە ەسكەرتكەن. بىراق اۋدان اكىمى دە ق ۇلىقسىز سياقتى. ەكى اۋىلدىڭ اكىمدەرىنىڭ ءتىپتى باس قاتىرعىلارى كەلمەيدى. ەلى ءۇشىن قۇربان بولعان اتامىزعا ۇكىمەتتەن بۇدان كەيىن قارجى ءبولىنىپ, بىردەڭە تۇرعىزىلادى دەۋ قيىن. وسىنىڭ ءوزىن ويبايلاپ ءجۇرىپ تۇرعىزايىن دەپ جاتقاندا مىنا جاسالىپ جاتقانى سۇمدىقتىڭ ءوزى, ناعىز ماسقارا! بولىنگەن قاراجات قۇرلىسشىلارعا تەگىس جەتپەگەن بولار, تەندەردىڭ سوندايى بار عوي», دەدى بەينەجازبا اۆتورى.
عالامتوردا كوپتىڭ تالقىسىندا تۇسكەن وسى وقيعاعا بايلانىستى قوستاناي وبلىسى اكىمدىگىنىڭ ءباسپاسوز قىزمەتى پىكىر ءبىلدىردى.
«بۇگىن قوستاناي وبلىسى جانگەلدين اۋدانى احمەت بايتۇرسىن ۇلى اۋىلىنداعى احمەت بايتۇرسىن ۇلىنىڭ تۋعان ءۇيىن قايتا جاڭعىرتۋ جۇمىستارىنا قاتىستى سىن-پىكىرلەر كەلىپ ءتۇستى. الاش ارىسىنىڭ 150 جىلدىق مەرەيتويى قارساڭىندا جانگەلدين اۋدانىنىڭ اكىمدىگى جوندەۋ جۇمىستارىنا بايقاۋ جاريالاپ, مەردىگەردى انىقتاپ, قۇرىلىس جۇمىستارىن باستاعان. الايدا ورىن العان جاعدايعا بايلانىستى وبلىس اكىمى ارحيمەد بەگەجان ۇلى مۇحامبەتوۆ اتالمىش ءۇيدىڭ قۇرىلىس جۇمىستارىن توقتاتىپ, اۋدان اكىمىنە ەسكەرتۋ جاسادى», دەپ جازدى قوستاناي وبلىسى اكىمدىگى ءباسپاسوز قىزمەتىنىڭ جەتەكشىسى كەنجە قونىسباي.
سونداي-اق ول الداعى اپتادا وبلىس اكىمى ارحيمەد مۇحامبەتوۆتىڭ احمەت بايتۇرسىن ۇلىنىڭ اۋىلىنا جۇمىس ساپارى جوسپارلانعانىن جەتكىزدى.
ساپار اياسىندا قۇرىلىس جۇمىستارىنا قاتىستى ۇسىنىستاردى تىڭداپ, ءتيىستى شەشىم قابىلدايتىن بولادى.