جاقىندا ەلورداداعى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ جانىنان «جەر ماسەلەلەرى بويىنشا ازاماتتارعا كەڭەس بەرۋ» ورتالىعى اشىلدى. ەندى اتالعان وقۋ ورنىنىڭ ستۋدەنتتەرى ازاماتتارعا كەڭەس بەرۋ جوباسىنا قاتىسپاق.
اتالعان ورتالىق استانا ماڭىنداعى تۇرعىنداردان باستاپ, بارشا قازاقستاندىققا قىزمەت كورسەتەدى. ەلىمىزدە جەر پايدالانۋشىلار قاتارىندا ساياجايلاردىڭ, جەكە ۇيلەردىڭ, ۋچاسكەلەردىڭ, اۋىل شارۋاشىلىعى جەرلەرىنىڭ يەلەرى مەن گاراجداردىڭ يەلەرى بار. وسى جەر پايدالانۋشىلار ءوز تەرريتوريالارىنا بايلانىستى ءىرىلى-ۇساقتى سۇراقتار تۋىنداعان كەزدە مەملەكەتتىك ورگاندارعا جۇگىنەدى. بىراق ماسەلە ءبىر ورتالىقتان شەشىلىپ ءبىر جەردەن جاۋاپ الۋ مۇمكىن بولمايدى. سودان ازاماتتار بىرنەشە مەكەمەگە باس سۇعىپ, سابىلىپ, ۋاقىتىن جوعالتادى. ورتالىق جەتەكشىسى فارابي ەرمەكوۆتىڭ ايتۋىنشا, كەڭەس بەرۋ ورتالىعى وسى ولقىلىقتىڭ ورنىن تولتىرۋ ماقساتىندا ستۋدەنتتەردى تارتۋ ارقىلى ء«بىر تەرەزە» قاعيداتى نەگىزىندە قۇرىلدى.
– ءبىز الدىمەن جۇمىستى ستۋدەنتتەردى ىرىكتەۋدەن باستادىق. جالپى قابىلدانعان 250 ستۋدەنتتىڭ ىشىندە 94 ەرىكتى جوباعا قاتىسۋعا نيەت ءبىلدىردى. ءوتىنىش بەرۋ وتە ىڭعايلى, تەلەفون قوڭىراۋلارى نەمەسە الەۋمەتتىك جەلىلەردەگى حابارلامالار ارقىلى دا قابىلدانادى. ستۋدەنتتەر مەن وقىتۋشىلاردان قۇرالعان جوبالىق توپ قازىردىڭ وزىندە جۇمىسقا كىرىسىپ كەتتى. وتىنىشتەر بازاعا ەنگىزىلەدى, ودان ءارى ورىنداۋشى مامان اينالىسادى. تۇپنۇسقا تەكسەرۋ ءۇشىن ساراپشىعا بەرىلەدى. ساراپتاما وڭ بولعاندا تۇپكىلىكتى جاۋاپ ءوتىنىش بەرۋشىگە جىبەرىلەدى. ءوتىنىش ءتۇسىپ, بارلىق جۇمىس تولىعىمەن اياقتالعاننان كەيىن ورىندالعان جۇمىس اكتىسىنە ەكىجاقتى قول قويىلادى. قاجەت بولعان جاعدايدا وتىنىمدەردى وڭدەۋ جۇمىسىنا ۋنيۆەرسيتەتتىڭ ستۋدەنتتەرىنەن بولەك, اگروونەركاسىپ كەشەنىن تسيفرلاندىرۋ سالاسىنداعى جەرگە ورنالاستىرۋ, ساۋلەت جانە ديزاين فاكۋلتەتى مەن تەحنولوگيالىق قۇزىرەتتىلىك ورتالىعىنىڭ ماماندارى تارتىلادى. سونداي-اق «ازاماتتارعا ارنالعان ۇكىمەت» كەاق دا كونسۋلتاتسيالىق كومەك كورسەتەدى, – دەيدى ف.ەرمەكوۆ.
ورتالىق وكىلىنىڭ مالىمدەۋىنشە, ماماندار جەرگىلىكتى جەرگە بارىپ, زاماناۋي تەحنولوگيالىق تۇرعىدان ماسەلەنى انىقتاۋعا دا قاتىسادى. ساۋاتتى ءارى جان-جاقتى جاۋاپ بەرۋ ءۇشىن ستۋدەنتتەر جەر زاڭناماسى بويىنشا الدىن الا دايىندىق كۋرستارىنان ءوتىپ وتىر. بۇل رەتتە QazBederProject جشس باسشىسى جانىبەك ساتتىباەۆ ستۋدەنتتەرگە ارنايى بىلىكتىلىگىن ارتتىرۋ ماقساتىندا سەمينار-ترەنينگتەر ۇيىمداستىرعان.
جۇمىس بارىسىنداعى تاجىريبەسىن بولىسكەن ورتالىقتىڭ مامانى, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ 2 كۋرس ستۋدەنتى مادينا تولەگەنقىزى: ء«بىز كەلىپ تۇسكەن اقپاراتتى دەرەۋ ورىنداۋعا كىرىسەمىز. وسىعان دەيىن بىزگە بەرىلگەن اقپاراتتار دەرەگىن قولدانامىز. ەگەر جۇمىس كۇردەلەنە تۇسسە, جەتەكشىلەرىمىز بەن قۇزىرەتتى ورىندارعا جۇگىنەمىز. وسىلايشا ۋاقىت وزدىرماي ماسەلەنى شەشۋگە تىرىسامىز», دەيدى.