بۇگىن, 16 ءساۋىر كۇنى پارلامەنت ءماجىلىسىنىڭ وتىرىسىندا تىندەر مەن اعزالاردى ترانسپلاتتاۋ جايى قارالدى. بۇل تۋرالى egemen.kz ءتىلشىسى حابارلادى.
اڭگىمە قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراۋ بارىسىندا قوزعالدى. زاڭ جوباسى بويىنشا بايانداما جاساعان دەنساۋلىق ساقتاۋ ءمينيسترى ساليدات قايىربەكوۆا قازىرگى ۋاقىتتا دەنساۋلىق ساقتاۋ سالاسىندا جاڭا تاسىلدەر ايقىندالىپ, قوعامدىق قاتىناستاردى دامىتۋدىڭ جاڭا دەڭگەيى بەلگىلەنىپ وتىرعانىن ەرەكشە اتادى.
«نەگىزىنەن زاڭ جوباسىنىڭ ماقساتى – قولدانىستاعى زاڭنامالىق ولقىلىقتاردى جويۋ, دەنساۋلىق ساقتاۋ جۇيەسىن جەتىلدىرۋ جانە ازاماتتاردىڭ قۇقىقتارىن قامتاماسىز ەتۋ», - دەدى مينيستر. ونىڭ ايتۋىنشا, جاڭا زاڭنىڭ جوباسىندا تىندەردى ء(تىننىڭ بولىگىن) مەن اعزالاردى (اعزالاردىڭ بولىگىن) ترانسپلانتتاۋعا قاتىستى نورمالار ەداۋىر جەتىلدىرىلىپ وتىر.
ۆەدومستۆو باسشىسى ترانسپلانتاتسيا ۇدەرىسىن جەتىلدىرۋ جانە دونورلار مەن ولاردىڭ كليەنتتەرىنىڭ قۇقىعىن قورعاۋ ماقساتىندا گەموپوەتيكالىق ءتىن جاسۋشىلارىن ترانسپلانتتاۋدى رەتتەۋ ماسەلەسى قاراستىرىلىپ وتىرعانىنا توقتالدى. ءتىرى دونوردان ۇلپا نەمەسە ورگاندى الۋ تەك قانا ونىڭ جازباشا نوتاريالدىق كۋالاندىرىلعان كەلىسىمىمەن جۇزەگە اساتىن بولادى. ال گەموپوەتيكالىق ءتىن جاسۋشالارىن الۋعا ونداي نوتاريالدىق كۋالاندىرىلعان كەلىسىم تالاپ ەتىلمەيدى.
اسقار تۇراپباي ۇلى.
دەرەككوز: egemen.kz.